Die PA het ’n beduidende politieke deurbraak in die Suid-Kaap behaal nadat die party twee wyke in George van die DA gewen het tydens ’n tussenverkiesing vandeesweek – uitslae wat dui op ’n verskuiwing in kiesersondersteuning in gebiede wat vir etlike jare tradisioneel deur die DA oorheers is.
Die tussenverkiesings is die afgelope Woensdag (21 Januarie) in wyk 17 en wyk 27 van die George-munisipaliteit gehou.
Volgens die Verkiesingskommissie (OVK) het die PA daarin geslaag om albei setels oor te neem wat voorheen deur die DA beklee is.
In wyk 17 het die PA-kandidaat Raphael John Goeieman die verkiesing met 59,98% van die stemme gewen, terwyl die kiesersopkoms 54,07% was.
Die wyk was sedert die 2021-plaaslike regeringsverkiesing onder DA-beheer.
In wyk 27 het die PA weer ’n noue oorwinning behaal toe Marchell Kleynhans met 51,35% van die stemme as wenner aangewys is.
Dit is die einste Kleynhans wat in Oktober verlede jaar uit die DA bedank en by die PA aangesluit het.
Die kiesersopkoms in dié wyk was 55,08%.
Die DA het die wyk tydens ’n vorige tussenverkiesing in Julie 2023 gewen, maar kon dit nie behou nie.
Die PA se oorwinning is ’n belangrike politieke hupstoot vir die party, veral in die Wes-Kaap waar die DA histories sterk steun geniet.
Die PA het die uitslae toegeskryf aan toenemende ontevredenheid oor dienslewering en ’n begeerte na alternatiewe plaaslike leierskap.
Ten spyte van die verliese behou die DA steeds beheer oor die George-munisipale raad deur middel van ’n koalisie met ander partye.
Die OVK se Wes-Kaapse provinsiale verkiesingsbeampte, Michael Hendrickse, het kiesers bedank vir hul deelname en ook hulde gebring aan verkiesingsbeamptes, wetstoepassing en die polisie vir hul rol in die gladde verloop van die verkiesing.
Die OVK het bevestig dat die uitslae die wil van die kiesers weerspieël en dat die proses vry en regverdig was.
Altesaam vier politieke partye het vir die wyk meegeding.
Wyk 17
| PA | 1 343 STEMME |
| DA | 848 STEMME |
| ANC | 42 STEMME |
| TRUTH | 25 STEMME |
Wyk 27
| PA | 1 081 STEMME |
| DA | 1 018 STEMME |
| ANC | 3 STEMME |
| TRUTH | 3 STEMME |
