Die Robotikaspan van Wesbank Sekondêr, Innovatrix, het ’n algehele tweede plek gedurende die First Tech Challenge (FCT) se nasionale byeenkoms verwerf, wat die afgelope naweek by die Parklands Kollege in Kaapstad plaasgevind het.
Hulle het ook met ’n bykomende trofee, die Motivate-trofee, weggestap.
Die gr. 12-leerders wat deel van die kodering -en robotikaprogram van hul skool is, het teen altesaam 32 spanne meegeding. Twee spanne het uit die buiteland gekom, terwyl ’n verdere agt spanne van Johannesburg ook aan die eindronde deelgeneem het.
Hulle is voorlopig in Julie vanjaar op pad na Texas om in die internasionale byeenkoms te gaan deel neem – dít nadat hul reis met hul robot Inno en die FTC-byeenkomste maar slegs in Oktober verlede jaar begin het.
Hul afrigter, mentor en onderwyser Kelvin-Jean Fortuin is op sy beurt ook as die afrigter van die jaar gekroon.
Fortuin se hart bons van trots en hy beskryf sy leerders as “ongelooflik”.
