BETHLEHEM – WOW-Spelfeeskampioen. Cay-Lynn Lamprecht, ’n gr. 5-leerder van Laerskool Truida Kestell, het ’n uitsonderlike prestasie behaal. Sy is as die nasionale wenner van die Afrikaanse Gr. 5-afdeling van die WOW-Spelfees in Stellenbosch gekroon.
Die kompetisie het vanjaar buitengewone uitdagings gebied, met deelnemers wat selfs woorde op gr. 8-vlak moes spel. Dit maak Cay-Lynn se oorwinning des te meer merkwaardig en getuig van haar toewyding, deursettingsvermoë en uitstekende taalvaardighede.
Die skoolgemeenskap is besonder trots op haar prestasie. Erkenning word ook gegee aan haar onderwyseres, mev. Janine Scheepers, vir haar leiding en ondersteuning, asook aan Cay-Lynn se ouers wat haar voortdurend aangemoedig en gemotiveer het gedurende haar spelreis.
Laerskool Truida Kestell vier hierdie besonderse prestasie saam met Cay-Lynn en wens haar alle voorspoed toe vir die pad vorentoe. Haar sukses dien as inspirasie vir mede-leerders en is ’n bewys van wat met harde werk, volharding en ondersteuning bereik kan word.
Foto verskaf
