Nasionale Talentkompetisie – Laerskool Truida Kestell, Bethlehem se TKS Tigers het in Vanderbijlpark aan die Nasionale Talentkompetisie deelgeneem. Hulle het hul merk gemaak en behaal ‘n goue glans tydens die talentkompetisie.
Die span se indrukwekkende dansoptrede het nie net die gehoor bekoor nie, maar ook die beoordelaars diep beïndruk. Die Tigers is met die gesogte High Gold-toekenning bekroon – ’n bewys van hul tegniese vaardigheid en artistieke uitdrukking. Asof dit nie genoeg was nie, het die span ook die Golden Buzzer ontvang. Dit is ’n uitsonderlike erkenning wat slegs aan uitmuntende deelnemers toegeken word. Hierdie eer beklemtoon die buitengewone gehalte van hul vertoning en die harde werk wat agter die skerms ingesit is.
Met hierdie prestasie het die Tigers gekwalifiseer om Suid-Afrika te verteenwoordig by die Internasionale Showcase and Talent America 2027-kompetisie. Dit is ’n mylpaal wat die dansers se toewyding en dissipline beloon en nuwe geleenthede vir groei en blootstelling in die wêreld van uitvoerende kunste open.
Die skoolgemeenskap het hul trots uitgespreek en elke danser met hierdie uitsonderlike prestasie gelukgewens. “Ons is ongelooflik trots op julle. Julle het die naam van Truida Kestell met eer hoog gehou,” het ’n woordvoerder van die skool gesê.
Spesiale waardering is ook uitgespreek teenoor Nadine Mollentze van Illusion Dance Studio Bethlehem. Sy het ‘n sleutelrol gespeel in die afrigting en mentorskap in die voorbereiding van die jong dansers. Hulle harde werk en passie vir dans het die span tot nuwe hoogtes gelei.
Foto’s verskaf
You must be logged in to post a comment.