Engelse taalverrykingskompetisie. Laerskool Truida Kestell het rede tot groot trots. Twee van hul Graad 3-leerders, Simé Scheepers en Boleng Mosekili, het uitstekende prestasies gelewer. Hulle het deelgeneem aan ’n Engelse taalverrykingskompetisie wat onlangs by Bethlehem Combined School aangebied is.
Die kompetisie, is deur die Departement van Onderwys georganiseer. Dit het jong leerders die geleentheid gebied om hul vaardighede in “Spelling Bee” en Leesbegrip te toets. Hierdie uitdagende items is ontwerp om nie net spelvaardigheid nie, maar ook kritiese lees- en begripsvermoë te bevorder.
Simé en Boleng het met selfvertroue en toewyding deelgeneem en hul skool se naam hoog gehou. Beide leerders het só goed gevaar dat hulle deurgedring het na die volgende rondte van die kompetisie. Hulle gaan teen ander toppresteerders van die streek meeding.
Die skoolhoof en personeel het hul trots uitgespreek en beklemtoon dat deelname aan sulke kompetisies ’n belangrike rol speel in die ontwikkeling van leerders se taalvaardigheid en selfvertroue. “Ons is uiters trots op Simé en Boleng. Hulle is ’n inspirasie vir hul klasmaats en ’n bewys van die waarde van harde werk en deursettingsvermoë,” het ’n woordvoerder van die skool gesê.
Hierdie prestasie dien as ’n herinnering dat die bevordering van geletterdheid en taalvaardigheid reeds op laerskoolvlak ’n sterk fondament lê vir akademiese sukses in die toekoms.
