Die 2026 ISSEA Saddle Seat Wêreldbeker, aangebied deur die United States Saddle Seat Association, vind van 29 Junie tot 2 Julie plaas. Dit word aangebied in Shelbyville, Kentucky, VSA – die hart van die Saddlebred-bedryf. Hierdie gesogte internasionale kompetisie bring die wêreld se beste ruiters bymekaar. Hier word hul vaardighede gedemonstreer op onbekende perde, wat hul tegniese presisie en aanpasbaarheid toets. Die formaat: ruiters neem deel in drie-gang (3G) en vyf-gang (5G) afdelings. Die perde wat in die kompetisie gebruik word is American Saddlebreds, Morgans, Arabians, National Show Horses, Friesians en Andalusians.
Suid-Afrika is ongelooflik trots op Jemma Orsmond van Hoërskool Witteberg in Bethlehem. Saddle Seat South Africa (SSSA) het nasionale proewe in Januarie 2026 gehou in Bloemfontein waar die top ses ruiters per afdeling gekies is om die land te verteenwoordig.
Geselekteerde ruiters ontvang Protea-kleure indien die kompetisie internasionale deelname insluit. Jemma is gekies om Suid-Afrika op die wêreldverhoog te verteenwoordig in hierdie wêreldklaskompetisie. Haar prestasie is ’n bewys van toewyding, talent en deursettingsvermoë.
