Bykans geskok het nasionale en internasionale media na Arthur Jantjies as “unknown man”, “little known” en “small town boy” verwys ná hy Saterdag die Two Oceans-ultramarathon in Kaapstad voor die neus van die gunsteling en meer bekende Onalenna Khonkhobe gewen het.
Noord-Kapenaars wat wedloop-uitslae dophou sal egter weet dat die 25-jarige Jantjies van Hopetown geruime tyd reeds in dié provinsie as ‘n langasem bekend is. Bowendien is daar min wedlope in dié omstreke waarin hy nie ‘n podiumplek behaal het nie.
Voortaan sal “King Arthur”, soos hy reeds in die Noord-Kaap genoem is, se naam in dieselfde asem as die “Queen of Two Oceans”, Gerda Steyn, genoem word.
Jantjies slaan toe kort voor eindstreep
Met Saterdag se Two Oceans-marathon oor ‘n afstand van 56 kilometer was Zimbabwe se Blessing Waison die eerste atleet om die berugte Constantia-nek te benader. Hy is gevolg deur die veelbekroonde Khonkhobe, die verdedigende kampioen Joseph Seutloali, en Jantjies.
Die drie het Waison op 49 kilometer ingehaal, met Khonkhobe wat die voortou by die 51 kilometer-merk geneem het. Seutloali het teruggeval, maar Jantjies het by Khonkhobe gebly. Net voor Chet’s Hill het Jantjies hom verbygesteek en ‘n oorwinning van 35 sekondes oor Khonkhobe behaal.
“Ek weet hy (Khonkhobe) is vinniger as ek. Maar in oefening tel ons altyd in die laaste 8 kilometer op. Ek het naby hom gebly, en hy het te vinnig moed opgegee. Toe het ek vir myself gesê ek gaan nou toe slaan,” het Jantjies direk ná die wedloop vertel.
“Dis ’n fenomenale stap. Dis geskiedenis,” sê Jantjies nadat hy die wedren in 3:09:25 voltooi het. “Ek is ’n kleindorpieseun wat die Two Oceans wen.”
Khonkhobe het die wedren in 3:10:00 voltooi, en Waison in 3:11:13. Hoewel dit nie haar beste tyd vir die Two Oceans was nie (3:27:43), is Steyn vir die sewende opeenvolgende keer die wenner in die vroue-afdeling.
Saterdag se wedren was Jantjies se tweede ultramarathon nadat hy die sesde plek in die 2025 City to City-marathon behaal het (2:54:26).
Tydens onderhoude wat Saterdag met hom gevoer is, het Jantjies krediet aan sy afrigter, John Hamlett, gegee vir die moeilike oefenkamp nadat hy aan die begin van die jaar by die Pan African Resources Club aangesluit het. Jantjies het vertel dat hy tydens sy oefentydperk gereeld lang afstande op 800 meter-elevasiehoeke gedoen het.
“Ek was vir agt weke weg van my familie. Wat hy ook al gesê het, het ek gedoen. Geen vrae gevra nie. My afrigter sê ons bly klein en vlieg onder die radar. Dit was beter as om soos ‘n kanonskoot weg te skiet.”
‘Wedloop maak deure oop’
“Dit is die eerste groot titel vir my dorp in die Noord-Kaap. Om hierdie wedloop te wen, maak deure oop, want dit plaas my naam êrens.”
Jantjies, wat aan die Hoërskool Steynville in Hopetown matrikuleer het, het hier sy hardloopvoete onder die leiding van Pamela Jonas en Maryna van der Walt ontdek. Daarna is sy talent verder by die Hopetown Running Club onder afrigter Sydney Stevens verfyn. Voordat Jantjies by Hamlett aangesluit het, was hy vir drie jaar lid van die Kgosi Galeshewe Athletics Club in Kimberley.
In sy gelukwensing het Thato Setlholo, president van Atletiek Griekwaland-Wes, gesê dat Jantjies die hele Noord-Kaap trots gemaak het. “Jou oorwinning is nie net ‘n persoonlike prestasie nie, maar ‘n simbool van wat moontlik is vir elke atleet in ons provinsie. Jou dissipline, veerkragtigheid en geloof het vrugte afgewerp op een van die grootste verhoë.”
Op Facebook skryf Venancia Mphahlele: “We all as Hopetowners are proud of you Arthur from near and far, we are beaming with pride Hopies-love se mense kan nie wag vir die champ se tuiskoms. Well done again, I still have goosebumps”.
Mase Mogorosi skryf: “Jy nodig net a Jet to cum back home. Wish I win the Lotto today, ek Jet jou myself. Hat off my Champ.”
LEES OOK: Northern Cape long-distance runner op a streak
Enkele vorige prestasies
Van Jantjies se vorige prestasies sluit in:
- op 28 April 2025 behaal hy sy beste tyd (2:19:42) tydens die Durban International Marathon;
- op 14 April 2025 behaal hy die sesde plek in die Two Oceans-halfmarathon;
- op 1 Maart 2025 wen hy die 55ste Diamond-marathon in Kimberley (2:22:53);
- op 2 Maart 2024 wen hy die 54ste Diamond-marathon (2:27:23);
- op 10 Februarie 2024 wen hy die Kloppers-marathon in Bloemfontein (2:33:28);
- op 3 Februarie 2024 wen hy die Vodacom Meerkat-marathon (2:32:17); en
- op 9 Desember 2023 wen hy die Magersfontein-veldwedloop van 25km (1:28:14).
You must be logged in to post a comment.