Wanneer Monument se Witbulle Saterdag 7 Maart in Kimberley aankom, wag Diamantveld met honger oë en harde hande. Vir albei kante is dit die eerste kans om ‘n stempel af te druk, ‘n boodskap te stuur, en momentum te bou.
Diamantveld het verlede week ‘n geopponeerde oefening teen Kalahari gehad, ‘n finale kans om sisteme te toets sonder die druk van ‘n telbord. Monnas kom vars van die voorseisoen af, gretig om te verbeter op verlede jaar se Noordvaal-beker-veldtog.
“Ons is baie opgewonde oor die begin van ons seisoen,” sê Vlos Molnar, Diamantveld se 1ste XV-afrigter.
En met goeie rede. Diamantveld is volgende naweek reeds in mededingende aksie in die Wesgrow Sentrale Skolesportreeks betrokke, ‘n kompetisie wat hulle verlede jaar gewen het. Saterdag is Molnar se laaste kans om sy troepe te beproef voordat hulle hul titel moet verdedig.
Daar is rede vir optimisme in Krugerdorp. ‘n Sterk o.16-groep, wat verlede jaar die Noordvaal-beker gewen het, verskaf vanjaar stewige versterking vir die 1ste XV.
Wedstryde soos dié teen Diamantveld en volgende naweek se kragmeting teen Welkom Gimnasium is nie net vriendskaplike opwarmers nie. Dit is kalibreerwedstryde, geleenthede om te toets of die sisteme stewig is, of die spelers gereed is, en of die span se ingesteldheid skerp genoeg is vir die Noordvaal Virseker-beker wat vroeg in Mei afskop.
Diamantveld se uitdaging
Molnar se uitdaging is ‘n ander soort. Met Wesgrow-aksie wat volgende naweek begin, moet Diamantveld momentum bou terwyl hulle terselfdertyd vars genoeg bly vir ‘n veeleisende Wesgrow-wedstryd teen Bethlehem Voortrekker.
Die manne van Kimberley het die laaste drie jaar aansienlik onder Molnar se leiding ontwikkel. Hy het besef daar is baie x-faktor-spelers in Diamantveld se geledere en hy het die skool se speelstyl gemoderniseer om hierdie talente te ontsluit.
Maar moet nie dink Diamantveld het sag geword nie. Hulle bly een van Suid-Afrika se mees fisiese spanne, gebou op voorspelers wat geen sentimeter agteruit beweeg nie.
Saterdag teen Monnas sal Molnar presies sien waar sy span staan.
Hierdie wedstryd sal voorlangs beslis word. Die span wat eerste voorlangs vou gaan ‘n lang dag beleef.
Onversetlike, fisiese rugby
Monnas en Diamantveld is albei vir onversetlike, fisiese rugby bekend. Albei wil voorlangs domineer, albei wil hul wil op die ander afdwing. Op die oog af lyk dit na ‘n uitputtingsoorlog.
Die skrum-en lyn-uit-stryd gaan deurslaggewend wees om druk op die opponent te plaas. Druk breek spanne, veral vroeg in die seisoen wanneer fiksheid en samehorigheid nog nie 100% is nie.
Terwyl Diamantveld se reputasie op fisiese dominansie gebou is, is Molnar slim genoeg om te weet rugby ontwikkel. Die dae toe ‘n skool slegs op grootte en krag kon staatmaak, is verby.
Sy moderne benadering, wat Diamantveld se tradisionele krag kombineer met die vermoë om aanvallers in spasie te gebruik, maak hulle gevaarlik onvoorspelbaar.
Monnas sal oplettend moet wees. As hulle te veel op die direkte gevaar fokus, sal Diamantveld se x-faktor-spelers dit uitbuit.
You must be logged in to post a comment.