Die Storie van Sauvignon Blanc, ‘n boekgesprek en begeleide wynproe, word op Donderdag 8 Oktober as deel van die Toyota Stellenbosch Woordfees aangebied.

Die aand, aangebied deur Sauvignon Blanc Suid-Afrika en Stellenbosch Wynroetes, beloof om die veelvuldige stories van dié kultivar te ontsluit.

Spier-wynlandgoed se keldermeester, Johan Jordaan, lei ‘n formele proe van wyne uit 11 Stellenbosch-wingerde – Bertha, Kleine Zalze, Le Grand Domaine, Neethlingshof, Neil Ellis, Spier, Thelema, Vergelegen, Villiera, Visio Vintners en Zorgvliet – terwyl van die wynmakers hul perspektiewe deel.

Die gesprek strek van vars, kusbeïnvloede style tot komplekse wyne met die struktuur om mettertyd te ontwikkel.

Die geleentheid sentreer rondom The Story of South African Sauvignon Blanc, die eerste definitiewe boek oor die kultivar in Suid-Afrika.

Die 248-bladsy publikasie bevat 100 stories van die mense, plekke en wyne wat die land se sauvignon blanc-reis gevorm het, plus ‘n aroma-wiel met 72 profiele.

Die R550-kaartjie sluit die boek, wynproe en gesprek in. Die byeenkoms, van 18:00 tot 19:00 in die Hofmeyr-saal in Kerkstraat, Stellenbosch, word in Afrikaans en Engels aangebied.

• Bespreek jou plek aanlyn deur Quicket.