‘n Ma van die Langrug-informele nedersetting het op Vrydag 16 Oktober tuis in ‘n snikhete vertrek die lewe geskenk, terwyl reddingswerkers met flitsligte gehelp het om haar en haar baba veilig deur die bevalling te help.

Sy het omstreeks 12:55 die lewe geskenk aan ‘n babadogtertjie, nadat lede van die Franschhoek First Responders ontbied is om haar by te staan.

Volgens Kurt Maske, ‘n plaaslike paramedikus en lid van die Franschhoek First Responders, is die noodgeval vroeër die oggend by die ambulansdiens aangemeld. Nadat die ma ‘n geruime tyd gewag het en reeds in “aktiewe kraam” was, is die reddingswerkers gekontak.

“Dit het duidelik geword dat die geboorte nie langer kon wag nie, toe die ma aanhoudende kontraksies begin ervaar en aangedui het dat sy die baba voel kom,” sê hy.

Die span het die vertrek so veilig en skoon as moontlik gemaak en toegang tot die ma se naaste familielede en die reddingswerkers beperk, sodat hulle genoeg ruimte en privaatheid kon hê om te werk.

Volgens Maske was die omstandighede uitdagend. Daar was geen elektrisiteit nie, die vertrek was uiters warm en die span moes met flitsligte werk.

Hy sê die beperkte ruimte het dit ook moeilik gemaak om rondom die ma te beweeg. “Die grootste uitdaging was die hitte, die gebrek aan voldoende beligting en die beperkte ruimte.”

In die omstandighede kon die span nie die ma van pynverligting voorsien nie en moes daarop fokus om haar deur die kraamproses te ondersteun en die geboorte so veilig as moontlik te hanteer.

Ná byna ‘n uur op die toneel is ‘n dogtertjie gebore.

Spesiale ervaring

Maske beskryf die kind se geboorte as ‘n ongelooflike oomblik. “Daar was ‘n ware gevoel van verligting, vreugde en geluk omdat ons pas ‘n nuwe lewe in die wêreld verwelkom het,” sê Maske.

Hy was die een om die ma te vertel sy het ‘n dogtertjie in die wêreld gebring. Sy het reeds twee seuns.

“Om daardie eerste huil te hoor, het ‘n enorme gevoel van verligting vir almal in die vertrek gebring, veral vir die ma en haar familie,” vertel hy.

Hoewel die span graag vir die ma ‘n gemaklike omgewing sou wou bied, het die dogtertjie se eerste huil volgens Maske alles die moeite werd gemaak.

Hy sê dit was ‘n welkome verandering van die noodgevalle waarop hulle gewoonlik reageer.

“Ons sien dikwels mense deur van die slegste oomblikke van hul lewe, en soms is ons daar wanneer ‘n lewe tot ‘n einde kom. Om ‘n nuwe lewe die wêreld te sien binnekom was ‘n spesiale ervaring,” sê Maske.

Ná die geboorte is die ma en haar dogtertjie per ambulans na die hospitaal vervoer.

Volgens Maske was albei stabiel toe die span die toneel verlaat het. Hulle het sedertdien egter geen terugvoer oor die toestand van die ma en dogtertjie ontvang nie.