Jongspan kan nou inskryf vir e’Bosch-vakansieprogram

Die e’Bosch-erfenisprojek nooi kinders om deel te neem aan sy skoolvakansieprogram.

In Junie en Julie kry kinders van die plaaslike dorpies die geleentheid om ‘n wêreld van verbeelding, kreatiwiteit en pret te betree wanneer die organisasie sy jaarlikse skoolvakansieprogram, met die tema “e’Bosch Sprokieswoud”, aanbied.

Die program is ontwerp om te inspireer en op te bou, en gebruik storievertelling as ‘n kragtige hulpmiddel om kinders te help om belangrike lewens- waardes soos moed, hoop, verbeelding en vriendelikheid te verken. Deur ‘n verskeidenheid boeiende aktiwiteite sal deelnemers nie net na stories luister nie, maar dit lewendig maak deur drama, kuns, musiek, beweging en spel.

Elke deelnemende dorpie sal sy eie unieke “sprokieswêreld” skep, volledig met ‘n naam, identiteit, lied, dans en kreatiewe optredes. Kinders sal saamwerk om iets betekenisvol te bou, wat spanwerk, selfvertroue en ‘n gevoel van behoort bevorder.

LEES OOK: e’Bosch vereer skoolvakansieprogram-span

Die program belowe ‘n lewendige en interaktiewe ervaring waar kreatiwiteit en persoonlike groei hand-aan-hand gaan. Dit is sorgvuldig ontwerp om ‘n veilige en inspirerende ruimte te bied waar kinders hulself kan ontdek, vriendskappe kan bou en positiewe waardes kan ontwikkel wat verder as die vakansie strek.

Die hoogtepunt van die program sal ‘n Sprokiesfees (Woensdag 15 Julie) en ‘n Wêreldbekerviering (Vrydag 17 Julie) wees, waar al die deelnemende groepe bymekaar sal kom vir ‘n kleurvolle parade, optredes en ‘n prettige sportdag.

Die twee dae beloof om die kreatiwiteit en gees wat tydens die program ontwikkel is, ten toon stel.

Ouers en voogde word hartlik aangemoedig om hul kinders vir hier- die opwindende vakansieprogram in te skryf. Dit bied meer as net vermaak – dit is ‘n geleentheid vir kinders om te groei, hulself uit te druk en deel te wees van iets groter in hul dorpie.

e’Bosch nooi ook gemeenskapslede, organisasies en vrywilligers om betrokke te raak.

LEES OOK: Skryf nou in en verbeter vaardighede met e’Bosch-kursus

Of jy vaardighede het in kuns, sport, mentorskap, of bloot ‘n passie het om met kinders te werk, jou bydrae kan ‘n betekenisvolle verskil maak.

Vrywilligers sal leiding en ondersteuning ontvang deur verskeie opleidingsessies, wat dit maklik maak vir enigeen wat bereid is om te help om deel te word van hierdie impakvolle inisiatief.

Die eerste opleidingssessie in Afrikaans is komende Saterdag (9 Mei) van 09:00 tot 12:00 by die De Laer Voortrekkersaal, 3 Simonsbergstraat, Stellenbosch. Die onderwerpe is persoonlike groei en drama.

• Skakel of stuur ‘n WhatsApp-boodskap na 061 595 4085 of ‘n epos na school.ebosch@gmail.com om ‘n kind in te skryf of as vrywilliger betrokke te raak en die opleidingsessies by te woon. Besoek ook www.ebosch.co.za.