Die Hoërskole Durbanville in Kaapstad en Waterkloof in Pretoria het die afgelope naweek koning gekraai by die nasionale eindronde van AfriForum se Dink of Sink- onvoorbereide debatskompetisie.
Die eindronde is op 27 September by Akademia-Leriba in Pretoria gehou waar die wenspanne uit die ses deelnemende provinsies om die nasionale titel meegeding het.
In die eindronde het die belowende jong debatteerders weer die geleentheid gekry om hul vaardighede op die proef te stel. Die doel van die kompetisie is om Afrikaanse debatkuns op laerskool, hoërskool en universiteit te bevorder, terwyl dit vir leerders ook ’n noodsaaklike vaardigheid aanleer wat hulle in hul toekomstige beroepslewe sal bevoordeel.
In die junior kategorie (gr. 8 tot 9) het die Hoërskool Waterkloof se Elzerie Vermaak, Ilanie Grobler en Ivan Louw koning gekraai terwyl Paul Roos Gimnasium (Stellenbosch) se Retief Ferreira, Lian Winckler en Paul du Plessis as die naaswenners aangekondig is.
In die senior kategorie (gr. 10 tot 12) het die Hoërskool Durbanville se Melandi Nabal, Islah Vorster en Tiaan Bierman die goue trofee huis toe geneem terwyl die Afrikaanse Hoër Meisieskool Pretoria se Mikayla de Jongh, Dané van Graan en Anja Botha as naaswenners uit die stryd getree het.
Altesaam 12 skole van oor die land heen het aan die eindronde deelgeneem. In die junior kategorie het die Hoërskole Waterkloof, Framesby (Gqeberha), Nelspruit, Merensky Landbou-akademie (Tzaneen), Paul Roos Gimnasium en C&N Meisieskool Oranje Sekondêr (Bloemfontein) deelgeneem.
Debatteerders van die Afrikaanse Hoër Meisieskool Pretoria, Hoërskool Pearson (Gqeberha), Hoërskool Nelspruit, Merensky Landbou-akademie, Hoërskool Durbanville en Hoërskool Sentraal (Bloemfontein) het in die senior kategorie deelgeneem. Elke span het drie debatte oor verskeie aktuele onderwerpe gevoer.
“Die leerders het hul take met groot vaardigheid aangepak en beïndruk met goed gestruktureerde, deeglik voorbereide argumente en kragtige teenargumente. Hulle het selfvertroue uitgestraal deur oortuigende lyftaal, duidelike stemgebruik en ’n opregte entoesiasme vir hul standpunte. Hierdie optrede het hul vermoë om krities te dink en doeltreffend te debatteer duidelik na vore gebring,” sê Nicolene Müller, AfriForum se koördineerder vir onderwys in die Suidstreek.
“Ons sien met opgewondenheid uit na die verdere ontwikkeling van hierdie kompetisie en die rol wat dit sal speel in die ontginning van jong debatteerders se volle potensiaal,” sluit Müller af.
You must be logged in to post a comment.