Die klanke van ‘n gejubel en die gestamp van voete het op Saterdag 14 Maart oor die netbalbane van die Gustrouw-sportterrein weerklink toe sewe plaaslike netbalklubs mekaar in die Helderberg-sportliga se eerste openingsdag-toernooi die stryd aangesê het.
Die unie is drie jaar gelede gestig sodat jong spelers van minderbevoorregte gemeenskappe aan plaaslike toernooie kan deelneem, aangesien finansiële beperkings hulle dikwels verhinder om in meer gevestigde ligas te speel.
Tarie United, Chris Nissan-park, Game Changers, Young Stars, Empire, Fire Balls en Macassar het deelgeneem. A- en B-spanne in die o.10-, o.12-, o.14- en o.16- ouderdomsgroepe het oor vier kwarttye gespeel, met senters, doelskieters en doelwagters wat hul netbalvaardighede getoets het.
Die openingsdag was ‘n groot sukses, met fluitjies wat wedstryde beheer het en ‘n gejuig wanneer doelskote deur die ringe gesweef het. Spelers het meegedoen, gelag en nuwe vriende gemaak.
Die organiseerders hoop die liga sal ‘n lanseringsplatform wees, aangesien baie spelers die potensiaal het om vir die SPAR Proteas te speel.
You must be logged in to post a comment.