Rachel Kolisi, Natasha Joubert en Therese Bam is onder die gaste wat op 1 November 2026 aan Wat ’n ma moet weet LIVE in Kaapstad deelneem.
Dié gesprek bring bekende gesigte, kundiges en ma’s byeen vir ’n oggend van gesprek oor vrugbaarheid, die tyd ná geboorte en die finansiële en mediese vrae waarmee gesinne te doen kry.
Die geleentheid, wat by Assembly in Woodstock van 09:00 tot 13:00 plaasvind, is ’n uitvloeisel van die VIA-moederskapprogram Wat ’n ma moet weet, waarin Efraine du Toit met ma’s oor hul ervarings gesels.
Finansiële kwessies en vrugbaarheid
Rachel neem saam met Karen Pienaar van Bestmed Mediese Skema en Carla Venter van Money with Carla aan die sessie oor finansiële en mediese kwessies deel. Natasha en die kliniese sielkundige Melody Pick gesels oor die tyd vir ’n ma ná geboorte, terwyl Therese en spesialiste van Wijnland Fertility Clinic ’n gesprek oor vrugbaarheid het.
Die drie sessies dek verskillende stadiums en aspekte van moederskap en die gehoor sal ook tydens vraag-en-antwoordsessies hul eie vrae kan stel.
Praktiese raad
Volgens die organiseerders is die doel om praktiese raad en persoonlike ervarings bymekaar te bring, met ruimte vir die onsekerhede waaroor ma’s nie altyd geleentheid kry om openlik te praat nie.
Vir Nini Conradie, vervaardiger van Wat ’n ma moet weet, sluit dié benadering aan by die stories wat die grondslag van die reeks vorm.
“Wat Wat ’n ma moet weet nog altyd besonders gemaak het, is die storievertelling – ma’s wat die regte, deurmekaar, pragtige waarheid van moederskap deel,” sê sy.
“Om nou te sien hoe dit groei van iets wat kykers by die huis sien na iets wat hulle persoonlik kan beleef, omring deur mekaar en deur kundiges wat hulle vertrou, is ongelooflik besonders. Dié geleentheid is die volgende hoofstuk van dieselfde gesprek, en ons kan nie wag om dit saam te voer nie.”
Die televisiereeks, wat in vennootskap met Bestmed Mediese Skema aangebied word, het oor twee seisoene verskillende ma’s se ervarings aan kykers bekendgestel. By hierdie geleentheid kry deelnemers die kans om ook met mekaar in gesprek te tree en vrae direk aan die kundiges te rig.
‘Jy’s nie alleen op hierdie reis nie’
Efraine sê sy sou self so ’n geleentheid waardeer het toe sy die eerste keer ma geword het.
“Ek wens daar was só iets toe ek vir die eerste keer ma geword het. Om ander ma’s se stories te hoor, kundige advies te kry en antwoorde op al jou vrae op een plek te vind, is van onskatbare waarde. Maar dalk die heel belangrikste: om te besef jy is nie alleen op hierdie reis nie.”
Benewens die gesprekke sluit die oggend ook persoonlike stories van ma’s in ’n gesellige omgewing met musiek, versnaperinge en geskenkpakkies in.
Die program bied verskeie aanknopingspunte, afhangend van elke deelnemer se omstandighede en die vrae waarmee sy opdaag.
Bestmed is die hoofvennoot van die geleentheid. Ander vennote sluit Wijnland Fertility Clinic, Baby Thrpy, Novalac Junior en Baba Co. in. Handelsmerkaktiwiteite, geskenke en verrassings word ook beplan, met produkvennote soos Mustela, BIBS, Stella Clip, Scandi League, Poetry en Miss Molly.
Charlize Odendaal, VIA se kommersiële bestuurder, sê die ondersteuning van borge en vennote maak dit moontlik om die geleentheid aan te bied.
“Niks hiervan gebeur sonder die mense wat glo in dit wat ons bou nie. Ons is diep dankbaar vir elke borg en vennoot wat aan boord gekom het – jul ondersteuning is wat ons in staat stel om hierdie gesprek van die skerm af en in ’n vertrek vol ma’s te bring. Dit is ’n voorreg om met borge en vennote saam te werk wat opreg omgee oor die vroue vir wie ons hier is.”
Wat ’n ma moet weet LIVE vind op 1 November 2026 van 09:00 tot 13:00 by Assembly in Woodstock plaas. Kaartjies kos R750 en is by Quicket beskikbaar.