Die Stormers sal dié week veral aan hul lynstane moet werk ter voorbereiding vir hul plaaslike derby teen die Haaie.
Dit was ’n groot struikelblok in Vrydagaand se nederlaag teen Edinburgh, toe die Kaapse span 10 keer balbesit uit hul eie ingooie verloor het en slegs ’n 57%-sukseskoers behaal het.
Dit het ook nie gehelp dat hulle hul gereelde haker, Andre-Hugo Venter, weens ’n kopbesering verloor het nie. Sy plaasvervanger, Vernon Paulo, het ’n aand gehad wat hy liefs sal wil vergeet.
Maar die ervare Stormers-flank (en soms haker), Deon Fourie, sê dit is belangrik om nie die skuld voor Paulo se deur te lê nie.
Fourie het Maandag aan verslaggewers gesê die span moet na die hele lynstaanstelsel en wedstrydplan kyk, en dit is waaraan die Stormers die komende dae sal moet werk.
“Ek dink hulle moet na die hele stelsel en die plan kyk. Ek dink dit is ’n bietjie onregverdig teenoor Vernon as die publiek en al die media net die vinger na hom wys. Ek dink dit is ’n kollektiewe probleem,” het Fourie gesê.
“Die toestande was ook nie ideaal nie. Ons moet dus na die hele prentjie kyk en na elke speler se rol in die lynstaan. Dit gaan nie net oor Vernon of die haker wat ingooi nie. Dit gaan oor die oplig, die regte besluite en alles wat daarmee saamgaan. Alles speel ’n rol. Ons sal dit dus ontleed en kyk waar ons kan verbeter.”
Fourie sê hy verstaan hoe Paulo ná die probleme met die lynstaan gevoel het en het daarop gewys dat hy self al tydens sy indrukwekkende loopbaan in dieselfde situasie was.
“Ja, ek sal hom beslis ondersteun,” het Fourie gesê.
“Ek dink ek was al deur dieselfde ding in my loopbaan. Dinge loop nie jou kant toe in ’n wedstryd nie en jy voel ’n bietjie terneergedruk, asof jy die span in die steek gelaat het. Maar dit is absoluut nie die geval nie. Soos ek gesê het, dit is ’n kollektiewe probleem.”
- Die Stormers (in swart) en die Haaie se wedstryd vind op 10 Oktober 16:00 in die DHL Stadion in Kaapstad plaas.