Nieu-Seeland se afrigter, Dave Rennie, het sy span se “karakter en durf” geloof nadat twee oortuigende oorwinnings oor Australië gehelp het om die teleurstelling van hul 3-1-reeksnederlaag teen die wêreldkampioen, Suid-Afrika, agter die rug te kry.
Nadat die All Blacks Australië verlede week in Auckland met 50-19 afgeransel het, het hulle Saterdag weer oorheers en die Wallabies met 43-21 geklop.
Die All Blacks se verwoestende eerste helfte in Sydney, waarin hulle ’n voorsprong van 36-7 teen rustyd opgebou het, was tipiese Nieu-Seelandse rugby. Hulle het ses drieë gedruk en Australië behoorlik van die veld af gespeel.
Tevrede, maar . . .
“Dit was uitstekend,” het Rennie gesê. “Baie van die dinge wat ons verlede week goed gedoen het, kon ons vir 40 minute aaneen regkry.
“Die gehalte van ons baldravermoë, die manier waarop ons wedlope gewen en met mening skoongemaak het, asook die gehalte van ons besluitneming en aangeë om spelers spasie te gee – ek het gedink ons was uiters klinies.”
“Ek is trots op die span se karakter en durf,” het hy bygevoeg. “Maar ek is teleurgesteld dat ons nie in die tweede helfte so klinies was nie. Ek dink as ons vroeg ’n paar drieë gedruk het, sou ons die wedstryd behoorlik buite Australië se bereik geplaas het.”
Twee van Nieu-Seeland se drieë is deur die herleefde heelagter Beauden Barrett gedruk. Hy het in die onlangse Rugby se Greatest Rivalry-reeks teen Suid-Afrika grootliks buite rekening gebly.
Beserings het die deur weer vir Barrett teen Australië oopgemaak, en die ervare speler met 147 toetse agter sy naam het die geleentheid met albei hande aangegryp. Rennie het hom vol lof toegeswaai.
“Dit beklemtoon net hoe gelukkig ons is,” het Rennie gesê. “Beauden se ervaring, kommunikasie en die gehalte van sy besluitneming is uitstekend. Dit is wonderlik om hom by die groep te hê.”
Die All Blacks het die kragmeting in Sydney aangepak sonder verskeie sleutelspelers wat weens beserings uitgesluit is, onder wie Ardie Savea, Leroy Carter, Caleb Clarke, Ruben Love en Richie Mo’unga.
Beserings aan Shannon Frizell en Samisoni Taukei’aho het die lys afwesiges verder vergroot voordat die span volgende maand na Europa vertrek vir die afsluiting van die Nasieskampioenskap.
Die kaptein, Codie Taylor, het gesê hy is trots op die manier waarop die span ná die teleurstelling teen die Springbokke teruggeveg het.
“Ons het ná daardie RGR eerlik na onsself gekyk. Soos altyd was ons nie tevrede nie, en ons het waarskynlik baie teleurgesteld weggestap,” het hy gesê.
“Maar ons het ook geweet dat ons ’n soort rugby gespeel het waarop ons werklik trots kon wees en waarop ons kon voortbou.
“Om daarna in Nieu-Seeland te gaan speel en die Bledisloe-beker te wen, en dan vandeesweek die groot geestelike uitdaging aan te pak om die standaarde wat ons vir hierdie span stel, self te handhaaf en ’n tree vorentoe te gee – dit was belangrik.
“Ek dink ons het dit vir die grootste deel van die wedstryd reggekry, en ek is baie trots op die manne.”