Paul de Villiers sal die Stormers Saterdag in hul Verenigde Rugbykampioenskap-wedstryd teen Scarlets in die Kaapstad-stadion verwelkom.
Die Springbok-flank het verlede week die kapteinskap oorgeneem nadat Ruhan Nel aan die wedstrydgroep vir die Kampioenebeker-kragmeting teen Bristol Bears onttrek is. Hy sal die rol teen die Walliese span behou, met afskop om 16:00 Saterdag.
De Villiers word in die groep van 23 spelers vergesel deur voormalige Junior Springbok-kapteins Riley Norton, Zachary Porthen en Sacha Feinberg-Mngomezulu, in ’n span wat ’n opwindende mengsel van jeug en ervaring bied.
Markus Muller maak sy eerste wegspringverskyning vir die Stormers op binnesenter en vorm die middelveldvennootskap saam met Wandisile Simelane, terwyl Nel uit voorsorg steeds rus.
Warrick Gelant begin op heelagter, terwyl Haashim Pead sy eerste begin op skrumskakel maak. Dit is die ander twee veranderings aan die agterlyn. Cobus Reinach en Yaqeen Ahmed sal na verwagting in die tweede helfte van die plaasvervangersbank af ingespan word.
In die losvoorspelers keer Hacjivah Dayimani terug aan die agterkant van die skrum nadat hy verlede week weens harsingskudding nie beskikbaar was nie. Sy terugkeer skuif Evan Roos na flank.
Daar is ook ’n splinternuwe slotkombinasie, met Norton en Connor Evans wat begin, terwyl JD Schickerling en Adré Smith ná rustyd hul kans behoort te kry.
Die volledige Springbok-voorry van Porthen, André-Hugo Venter en Ntuthuko Mchunu word ondersteun deur Olly Reid, Lukhanyo Vokozela en Neethling Fouché.
Die Stormers-breier, John Dobson, sê dit behoort ’n opwindende span te wees om dop te hou terwyl hulle hul onoorwonne reeks teen Scarlets probeer voortsit.
“Ons het vier spelers in Markus Muller, Riley Norton, Olly Reid en Yaqeen Ahmed wat nog jonk genoeg is om vir die DHL Stormers Bolts te speel, saam met iemand soos Deon Fourie, wat die tweede meeste wedstryde in die geskiedenis van dié klub gespeel het.
“Daar is werklik dinamiese kombinasies in beide die beginspan en onder die plaasvervangers, en hulle sal deeglik getoets word teen ’n Scarlets-span wat die seisoen indrukwekkend begin het.
“Ons het hierdie maand uitstekende ondersteuning geniet en almal sien weer uit na ’n elektriese atmosfeer in die DHL-stadion,” het hy gesê.
- Saterdag se wedstryd skop om 16:00 af.