Ierland se stut Tadhg Furlong kan steeds volgende maand teen die Springbokke uitdraf nadat ’n dissiplinêre komitee ’n klagte van vuilspel teen hom van die hand gewys het.
Furlong is Donderdag deur ’n onafhanklike dissiplinêre komitee vrygespreek ná ’n beweerde voorval tydens Leinster se Verenigde Rugbykampioenskap-wedstryd teen Munster verlede naweek.
Munster se Gavin Coombes het beweer dat Furlong aan sy geslagsdele gegryp het. Die voorval is ingevolge Wêreldrugby se reël 9.27, wat optrede teenstrydig met goeie sportmanskap verbied, ondersoek.
Die komitee het die klagte egter eenparig van die hand gewys en bevind dat Furlong nie die reël oortree het nie. Dit het terselfdertyd aangedui dat Coombes ’n eerlike weergawe van sy herinnering aan die voorval gegee het.
Die beslissing beteken dat die 33-jarige Furlong beskikbaar is vir Ierland se komende internasionale wedstryde, insluitend die kragmeting teen die Springbokke op 21 November in Dublin.
Die saak het herinneringe opgeroep aan Bulls-haker Jan-Hendrik Wessels, wat verlede seisoen ’n skorsing van nege weke vir ’n soortgelyke oortreding ontvang het.
Die volledige skriftelike motivering vir die komitee se beslissing sal later bekend gemaak word.