Die Suid-Afrikaanse Weerdiens het ’n geel vlak 2-waarskuwing vir erge donderstorms in dele van die Oos-Kaap uitgereik, terwyl uiters hoë veldbrandgevaar ook in dele van die land verwag word.
Die waarskuwing vir Sondag 11 Oktober geld vir die westelike en sentrale dele van die Oos-Kaap, waar die storms plaaslike skade aan nedersettings, vee en tydelike strukture kan veroorsaak. Plaaslike onderbrekings van krag- en kommunikasiedienste is ook moontlik.
Gebiede wat deur die donderstormwaarskuwing geraak kan word, sluit onder meer Komani (Queenstown), Makhanda, Peddie, Somerset-Oos, Adelaide, Tarkastad, Stutterheim, Cofimvaba, Oos-Londen, Graaff-Reinet, Komga, Dutywa, Butterworth, Addo, Port Alfred en Cradock in.
Intussen word uiters hoë veldbrandgevaar in die oostelike en sentrale dele van die Noord-Kaap, plek-plek in die Oos-Kaap en in die suidelike en sentrale dele van KwaZulu-Natal verwag.
Die publiek word versoek om nie vure onder dié toestande te maak nie en om enige rook of tekens van ’n veldbrand onmiddellik aan te meld.
Hoewel die meeste dele van die land warm tot baie warm weer kan verwag, word verspreide buie en donderbuie ook in verskeie streke voorspel.
Motoriste en inwoners in gebiede wat deur die waarskuwings geraak word, moet op hoogte bly van die jongste weerinligting en versigtig wees wanneer storms ontwikkel.