Beauden Barrett en Josh Moorby het elk twee drieë gedruk toe ’n loslit Nieu-Seeland-span Saterdag die Wallabies met 43-21 in Sydney afgeransel het om hul wenreeks teen die Australiërs tot 13 toetse te rek.
Die All Blacks het sewe drieë teenoor die gashere se drie gedruk en daarmee die groot gaping tussen die twee spanne verder beklemtoon, nadat hul 50-19-oorwinning verlede week in Auckland verseker het dat hulle die Bledisloebeker behou.
Nieu-Seeland het ná ’n verwoestende eerste helfte met 36-7 voorgeloop, voordat die gashere teruggeveg het om die skade in ’n stampvol Stadium Australia te beperk.
“Ek is ongelooflik trots op die manne en die manier waarop ons in die eerste helfte uitgekom het,” het die Nieu-Seelandse kaptein, Codie Taylor, gesê.
“Dit was hierdie week ’n groot uitdaging vir ons om op verlede week se uitstekende vertoning voort te bou, en ek dink ons was fantasties in daardie eerste 40 minute. Ons het vertroue in onsself gehad en gespeel wat voor ons was.
“Maar die tweede 40 minute was ’n ander storie.”