Kenia het sy eerste Ebola-verwante sterfte ooit aangeteken nadat ’n man wat in die Demokratiese Republiek die Kongo (DRK) gewoon het, na die land teruggekeer het, het die minister van gesondheid Dinsdag aangekondig.
Die man, wie se identiteit nie bekend gemaak is nie, het sowat ’n maand gelede siek geword en behandeling in die DRK ontvang voordat hy na Kampala, die hoofstad van Uganda, gereis het, het die minister van gesondheid, Aden Duale, aan verslaggewers gesê.
Die man het daarna op 3 Oktober na Nairobi gevlieg, waar gesondheidsowerhede hom getoets en bevestig het dat hy positief is vir die dodelike virus.
“Hy is ongelukkig gisteraand omstreeks 23:30 oorlede,” het Duale gesê.
Die departement van gesondheid het 28 mense wat met die oorledene in kontak was, geïdentifiseer, insluitend familielede en gesondheidswerkers. Tot dusver het slegs een toets positief teruggekom.
“Ek wil die publiek verseker dat daar geen rede vir paniek is nie, aangesien alle stelsels in plek is om die verspreiding van die siekte te beperk,” het Duale bygevoeg.
Kenia het nog nooit voorheen ’n Ebola-geval aangeteken nie. Vroeër vanjaar het Keniane egter heftig gereageer op regeringsplanne om ’n Ebola-fasiliteit by die Laikipia-lugbasis, sowat 200 km van Nairobi, op te rig.
Die DRK het middel Mei sy 17de Ebola-uitbreking verklaar. Die siekte het die afgelope 50 jaar meer as 15 000 mense in Afrika doodgemaak.
Teen 2 Oktober het die Wêreldgesondheidsorganisasie 4 082 sterftes uit 8 463 gevalle aangeteken sedert die opduiking van die Bundibugyo-stam van die virus. Geen entstof of spesifieke behandeling bestaan tans vir dié stam nie.