Die Bulle het Saterdag hul Verenigde Rugbykampioenskap-veldtog op ’n hoë noot afgeskop met ’n klinkende 47-13-oorwinning oor Zebre in Italië, en afrigter Johan Ackermann was ná die wedstryd ’n gelukkige man.
Die Pretorianers het stadig uit die blokke gekom en was in die eerste kwart onder druk van Zebre, maar het daarna hul ritme gevind en uiteindelik sewe drieë gedruk.
Ná die Bulle se eerste twee tuisnederlae in verlede seisoen se toernooi het Ackermann erken dat daar voor die wedstryd heelwat senuwees was.
“Die belangrikste ding wat ons hieruit neem, is dat ons die oorwinning behaal het,” het Ackermann gesê.
‘Bietjie bekommerd’
“Verlede jaar is steeds in jou agterkop, en ons het ons eerste twee tuiswedstryde verloor, so daar was altyd ’n mate van senuweeagtigheid. Ons het nie baie opwarmingswedstryde gespeel nie. Ek dink elke speler wat vanaand gespeel het, het net sowat 40 minute se wedstrydtyd gehad. Ons was dus ’n bietjie bekommerd dat ons dalk nie so goed sou wees as wat ons wou nie.”
Ackermann het erken dat die Bulle stadig begin het, maar was tevrede met die manier waarop sy span Zebre se vroeë druk hanteer het.
“Hoewel ons goed voorberei het, het ons in die eerste paar minute ’n paar slordige foute gemaak,” het hy gesê.
“Dit is iets wat ons moet regstel, want Munster gaan ’n heel ander uitdaging bied. As ons nie akkuraat is wanneer ons die 22 binnetree of daaruit probeer kom nie, sal hulle ons daarvoor laat betaal.”
‘Tevrede’
Ten spyte van die foute was Ackermann veral tevrede met die Bulle se verdediging tydens die moeilike eerste kwart.
“Ons het in daardie eerste 15 minute, toe ons baie foute gemaak het, baie veggees gewys en hulle steeds weggehou,” het hy gesê.
“As ons toe ’n drie afgestaan het, sou dit hulle baie momentum gegee het. Vir my was dit die groot positiewe. Teen ’n taai teenstander, op ’n moeilike plek om te speel ná die lang reis, het die manne baie karakter in die verdediging gewys. Ons sal vanaand veral tevrede wees met ons verdedigende vertoning.”
- Die Bulle vlieg nou Ierland toe, waar hulle Saterdag 20:45 op Thomond Park teen Munster te staan kom.