’n Britse egpaar wat in Iran aangehou word op aanklagte van spioenasie, het hul jongste hongerstaking van etlike maande beëindig in protes teen hul behandeling in die tronk, het hul familie Maandag gesê.
Lindsay en Craig Foreman, albei in hul vroeë 50’s, is in Januarie 2025 in hegtenis geneem terwyl hulle op ’n motorfietsreis om die wêreld deur sentraal-Iran gereis het.
In ’n Facebook-plasing het een van hul vriende, Carol Barton geskryf: “My goeie vriende Lindsay en Craig Foreman het die wêreld deurkruis en vir vreemdelinge gevra: ‘Wat is ’n goeie lewe?’ Nou, terwyl hulle ’n nagemerrie deur ’n gevangenis in Iran in die gesig gestaar word, gee hulle steeds dieselfde antwoord: ‘Goedhartigheid. Dankbaarheid. Verbondenheid’.”
Die paartjie is elk in Februarie vanjaar tot 10 jaar tronkstraf gevonnis op spioenasie-aanklagte wat hulle ontken. Craig Foreman se vonnis is daarna met nog twee jaar verleng nadat hy volgens sy stiefseun in Julie met die media gepraat het.
Die egpaar het hul jongste hongerstaking in Mei begin om te protesteer teen die “ernstige fisieke tol” wat hul aanhouding eis. Volgens hul familielede het Craig Foreman 93 dae lank geweier om te eet en sy vrou 84 dae.
Die egpaar het herhaaldelik gekla oor oorvol en onhigiëniese toestande in Evin-gevangenis, ’n groot, swaar beveiligde kompleks in die noorde van Teheran. Menseregtegroepe sê die gevangenis huisves politieke gevangenes en buitelandse burgers.
“Ná byna drie maande van protes het Lindsay en Craig besluit om hul hongerstakings te beëindig,” het die familie in ’n verklaring gesê.
Die egpaar het die laaste vyf dae van die aksie omskep in ’n “vas vir die goeie”, met die doel om die protes in iets konstruktiefs en kollektiefs te verander en nie net aandag op hul eie aanhouding te vestig nie, maar ook op die regte en menswaardigheid van ander mense wat in Iran aangehou word.
Dit volg nadat die egpaar laat verlede jaar ook ’n gesamentlike hongerstaking van ’n maand gehou het om te eis dat Iranse owerhede hulle meer gereeld kontak met hul families laat hê.
Sowat ’n maand ná die begin van die jongste hongerstaking het VN-menseregtekenners gewaarsku dat die egpaar ernstige risiko’s in die gesig staar. Hulle het ook aangevoer dat hul aanhouding moontlik op “gyselaarneming” kan neerkom.
Lindsay Foreman se seun, Joe Bennett, het in Maandag se verklaring gesê die onmiddellike fokus bly op sy ma en stiefpa se gesondheid en welsyn, asook om hul vrylating te verseker ná meer as 18 maande in aanhouding.
Hy het gesê dit het onlangs nog moeiliker geword nadat die Britse ambassade op 22 Julie weer gesluit is en nou vanaf ’n afstand funksioneer.
Bennett, wat voltyds vir hul vrylating veldtog voer, het voorheen gepraat oor sy vrese dat die Amerikaanse oorlog met Iran ’n negatiewe uitwerking op hul saak kan hê.