DStv-intekenare sal vanaf September van nog vier bekende kanale moet afskeid neem nadat MultiChoice aangekondig het dat Mzansi Bioskop, Mzansi Magic, M-Net Movies 1 en kykNET Lekker van die betaal-TV-diens verwyder word.
Die kanale sal op 16 September om 23:59 ophou uitsaai. MultiChoice sê die besluit is deel van ’n hersiening van DStv se kanaalaanbod namate kykgewoontes verander.
Volgens MultiChoice word die aanbod eerder rondom minder, sterker kanale saamgetrek, met die doel om soortgelyke inhoud nie oor te veel kanale te versprei nie. Die maatskappy sê inhoud wat tans op die kanale beskikbaar is, sal steeds deur ander DStv-kanale beskikbaar wees.
Die jongste aankondiging kom nadat DStv reeds vanjaar verskeie ander kanale verloor het. BET Africa, CBS Reality, CBS Justice en MTV Base is vroeër gestaak nadat Paramount besluit het om sy lineêre televisiebedrywighede in Afrika af te skaal. Tlnovelas is ook in Januarie verwyder en later deur Novelas+ vervang.
Dit beteken dat 11 kanale in 2026 van DStv se aanbod verdwyn het.
Die veranderinge kom te midde van ’n groter hersiening van DStv se bedrywighede ná Canal+ se verkryging van MultiChoice. Die maatskappy het die afgelope tyd ook op kostebesparing en doeltreffender inhoudsbesteding gefokus.
Vir kykers beteken die kanaalsuiwering egter dat hulle van hul bekende gunstelingprogramme op hul gewone kanaalposisies kan moet afskeid neem, selfs al bly sommige van dié inhoud elders op die platform beskikbaar.
Die vraag wat nou voor DStv-intekenare lê, is of ’n kleiner kanaalaanbod uiteindelik ’n beter kykervaring bied – of bloot beteken dat hulle vir minder kanale dieselfde intekenfooi moet betaal.