Blindes wys die weg aan tussen Kaapstad en Worcester

Die Pioneer Rally-geldinsameling is nie net ‘n gebeurtenis nie – dit is ‘n viering van moontlikhede, samewerking en die onwrikbare gees van die Pionierskool vir Siggestremdes.

Hierdie inspirerende inisiatief bring bekende Suid-Afrikaners agter die stuur van voertuie, met oudleerders van die Pionierskool wat as navigators optree. Wat hierdie stiptheidsren so buitengewoon maak, is dat die rigtingaanwysings in braille is en dat dit deur die navigators voorgelees en verduidelik word om die bestuurder deur die roete van Kaapstad tot Worcester te lei.

Dit is ‘n reis waarin rolle omgeruil word – waar die siggestremde as die gids optree om die siende deur die onbekende te lei. Dié interaktiewe en simboliese gebaar wys dat  gestremdheid nooit die einde van ‘n droom hoef te beteken nie. Inteendeel – dit wys dat moed, vaardigheid en vasberadenheid grense kan oorsteek.

Die Pionierskool, wat omsien na leerders met visuele én addisionele gestremdhede, is diep dankbaar vir die onwrikbare ondersteuning van die bekendes, oud-leerders en ruimhartige borge wat hierdie unieke geldinsameling ondersteun. Alle geld wat deur hierdie unieke  inisiatief  ingesamel  word, sal aangewend word om hulpmiddels soos braille-handboeke, rekenaarprogramme, mobiliteitsopleiding, gespesialiseerde onderrig en terapeutiese dienste te ondersteun – noodsaaklike boustene om te verseker dat siggestremde leerders hul volle potensiaal kan bereik.

Elke deelnemer, elke draai in die pad, en elke meter vorentoe vertel ‘n storie van hoop en deursettingsvermoë. Dit is ‘n kragtige herinnering aan wat moontlik is wanneer ons mekaar ondersteun – ten spyte van ons verskille.

Pionierskool eer die ongelooflike moed van hul inspirerende 36 oud-leerders wat as navigators gaan optree. Hulle leer ons om met ander oë na die wêreld te kyk en wys ons dat die donker nooit heeltemal te donker is wanneer iemand die pad saam met jou stap nie.

Aan die Pioneer Rally-borge, bekendes en ondersteuners – dankie dat julle saam met Pionierskool agter die stuur van hoop en geleenthede inklim en dat julle saam met ons sien; nie net met die oë nie, maar ook met die hart.

• Kontak Cathy of Colleen by 023 342 2313 of marketing@pioneerschool.org.za vir enige navrae.