‘Te min help gidshonde oplei’

’n Wêreldwye tekort aan vrywilligers wat gidshonde wil oplei en versorg totdat hul eintlike opleiding begin, heers tans, wat verskeie nagevolge vir gestremdes kan inhou.

Volgens die Suid-Afrikaanse Gidshond-vereniging (Sagda), ’n organisasie sonder winsbejag, ervaar Assistance Dog International (ADI) ’n toename in die vraag na gidshonde, maar ’n afname in vrywilligers wat dié honde oplei.

Hoewel dit ’n internasionale probleem is, sal inwoners van Suid-Afrika, en spesifiek Worcester, wat ’n groot siggestremde gemeenskap huisves, die rimpeleffek daarvan voel.

Standard het uitgereik na Cheryl Robertson van die Wes-Kaapse tak van Sagda, wat verduidelik het dat die wêreld ’n tekort aan gidshonde ervaar omdat die honde nie noodwendig by die mens wat aansoek gedoen het, pas nie, en dan ’n vertraging in dié proses veroorsaak.

“
Sodra daardie honde opgelei is en gereed is om na ’n blinde te gaan, begin ons [Sagda] dan soek na iemand wat geskik is en die beste by hulle sal pas.

“So, net omdat iemand bo-aan die lys is, beteken dit nie dat die hond wat gereed is, by jou gaan pas nie,” volgens Robertson.

Die rede hiervoor is dat ’n vinnige gidshond nie by iemand sal pas wat stadig loop nie, wat dan ’n vertraging sal veroorsaak wanneer die hond nie geskik is nie, en die gestremde nog langer moet wag.

Nog ’n terughoudende faktor is die tekort aan finansiering om ’n gidshond op te lei.

Sagda, asook verskeie ander organisasies oor die wêreld heen, maak staat op skenkings, en wanneer daardie geld opdroog, veroorsaak dit ’n vertraging.

Robertson het verduidelik dat die strawwe opleiding wat dié soort honde ontvang, Sagda nagenoeg R100 000 per hond kos,

Dus, om die tekort uit te wis en die waglys effens te verkort, word mense aangemoedig om skenkings te gee.

Tans borg die Pick n Pay-groep ’n bekende swart Labrador, Luca, ’n gidshond wat in Vishoek woon en op inkopiesakke en sosiale media van die kruidenierswarewinkel pronk.

Hy is deur Sagda opgelei.