Groot koeke, klein koeke, plaatkoeke, skuinskoeke, koeke met gate!
Só het ’n ywerige stalletjiehouer Maandagoggend vroeg van hom in Le Sueurstraat in Worcester by dié dorp se jaarlikse Paasbasaar laat hoor.
Durban- en Le Sueurstraat asook Leipoldtlaan en omliggende strate was op Paasmaandag ’n miernes van bedrywighede toe derduisende Worcesteriete en mense wat bande met dié dorp het, saamgetrek het om in hierdie jare lange kulturele fees te kon deel.
Die spyskaart het soos altyd iets vir ’n ieder en ’n elk gebied – van hamburgers, worsrolletjies, spookasem, koeksisters en speelgoed tot chemiese middels om jou potte en panne en skoene mee op te knap en weer soos nuut te laat lyk, was beskikbaar.
Die basaar was ook ’n platform waar geliefdes mekaar ná jare weer gesien het.
Boetie Springveldt, ’n ou bekende in plaaslike musiekkringe, het die joligheid by die Congregational kerk in Leipoldtlaan verder opgehelder en basaargangers oudergewoonte met sy goue oue treffers in vervoering gehad.
Charlie Springveldt en sy span se smullekker-boereworsrolletjies en watertand-braaigeregte deur die VGK Worcester Sentraal was soos altyd ’n wenner.
Gemeet aan Maandag se groot opkoms – deur oud en jonk – was dit duidelik dat Worcester se Paasbasaar die hoogtepunt op baie mense se sosiale kalender is.
