‘n Reeks bewusmakingsprogramme in die Kaapse Wynland-distriksmunisipaliteit is ter viering van Vervoermaand (Oktober) aangebied om padveiligheid te bevorder en gemeenskappe van onder meer die gevare van mensehandel bewus te maak.

Dit is deur die departement van plaaslike regering se ­gemeenskapsontwikkelings­­-werkersprogramme gekoördineer en in samewerking met verskeie vennote waaronder die departement van landbou, die departement van mobiliteit, die nasionale vervolgingsgesag (NVG), die Thuthuzela-sentrum, die Kaapse Wynland-distriksmunisipaliteit en die Regeringskommunikasie- en Inligtingstelsel (GCIS) aangebied.

Die inisiatief beklemtoon die belangrikheid van samewerking tussen regeringsdepartemente, instellings en gemeenskappe om bewustheid oor padveiligheid te verhoog en maatskaplike uitdagings soos mensehandel aan te pak.

As deel van die inisiatief is verskeie skole in landelike gebiede in die Kaapse Wynland besoek, waar leerders ingelig is oor die belangrikheid van padveiligheid en hoe om hulself as voetgangers en padgebruikers te beskerm.

Die leerders het ook glimbaadjies ontvang om hulle meer sigbaar vir motoriste te maak – veral wanneer hulle langs paaie beweeg.

Die uitreikprogramme het ook klinieke in die distrik bereik, waar gesondheidsorgfasiliteite as platforms gebruik is om belangrike veiligheidsboodskappe met pasiënte en ander gemeenskapslede te deel. Die publiek is aangemoedig om op die paaie verantwoordelik op te tree en bewus te wees van die risiko’s wat met onveilige padgebruik gepaardgaan.

Benewens padveiligheid is inligting oor mensehandel ook gedeel. Die doel van hierdie bewusmakingskomponent was om gemeenskappe oor die gevare van mensehandel in te lig, hulle te help om moontlike waarskuwingstekens te herken en hulle bewus te maak van die belangrikheid daarvan om gevalle of vermoedelike gevalle aan te meld. Mensehandel is die onwettige koop, verkoop, vervoer of werwing van mense teen hul sin vir die doel van uitbuiting of kommersiële gewin.

Die samewerking tussen die betrokke departemente en organisasies het dit moontlik gemaak om verskillende gemeenskappe deur middel van bestaande opvoedkundige en gesondheidsorgplatforms te bereik.

LEES OOK: Transport costs prevent 6.9 million South Africans from reaching work or education