“Saldanhabaai Munisipaliteit het ’n dapper stap geneem om die munisipaliteit se eie lewensredders aan te stel. Die stap is nie net deel van die munisipaliteit se toewyding om vakansiegangers en strandbesoekers veilig te hou nie, maar vorm ook deel van die munisipale jeugontwikkelingsprogram,” het SBM-burgermeester André Truter gesê tydens die bekendstellingsgeleentheid vanoggend (18 Desember) by Saldanhabaai-strand langs die kampterrein.
Carol Feris van SBM Rampbestuur, wat die verrigtinge gelei het, het verduidelik dat die munisipaliteit hande gevat het met die Nasionale Seereddingsinstituut (NSRI) en 15 plaaslike jeugdiges deur ’n intensiewe opleidingsprogram geneem het om as waardige lewensredders by vyf strande in die SBM-gebied aangestel te word.
Voordat die verrigtinge begin het, het SBSI (Saldanha Bay Safety Initiative) koördineerder Joey Pieters met Skriflesing en gebed geopen. Hy het gelees uit Jesaja 41:10: “Moet nie bang wees nie, want Ek is met julle. Ek is jou God. Ek versterk jou.”
Pieters het die lewensredders beskryf as jong mense wat gekies is vir ’n spesifieke doel en wat vertrou word om strandbesoekers veilig te hou. Hy het hulle aangemoedig om eienaarskap van die strande te neem en nie bang te wees om hul mandaat uit te voer nie.
“Julle is nie alleen nie. God is met julle en sal vir julle leiding gee,” het Pieters gesê.
Feris het daarop gewys dat verdrinking wêreldwyd ’n groot kommer is en dat die feestyd, hoewel dit ’n tyd van vreugde is, ook onsekerheid bring oor die veiligheid van veral kinders. Lewensredders sal tydens die feestyd armbande aan kinders uitdeel waarop hul name geskryf word, sodat verdwaalde kinders vinniger met hul ouers herenig kan word.
Feris het beklemtoon dat nooddienste mekaar nodig het. Die aanstelling van SBM-lewensredders is deel van die munisipaliteit se sosiale verantwoordelikheid, nie net om mense veilig te hou nie, maar ook om plaaslike jeugontwikkeling te bevorder.
“Ons het ’n gesamentlike doel om lewens op strande te red en terselfdertyd ons plaaslike jeug te ontwikkel,” het sy gesê.
Truter het in sy toespraak gesê dat proaktiwiteit lewens red. Hy het die jeugontwikkelingsprogram ondersteun en genoem dat die lewensredders wat tydens die feesseisoen die strande beveilig, in die wintermaande ander vaardighede sal aanleer. Hy het elkeen aangemoedig om hoop en bemagtiging terug te neem na hul gemeenskappe.
Voordat die veiligheidstoerusting, wat deur plaaslike besighede en gemeenskapslede geborg is, oorhandig is, het Truter aan elke lewensredder 30 sekondes gegee om hulself voor te stel.
Die dapper span het elk die mikrofoon geneem en boodskappe soos die volgende gedeel:
• “Om dapperheid te wys in die gemeenskap, gee ander hoop.”
• “Ek het as kind amper verdrink, en is trots om vandag op die strand uit te stap as ’n lewensredder en te weet ek kan iemand in nood help of ’n lewe red.”
• “Om ’n lewensredder te wees, gee vir my doelwitte in die lewe, en so kan ek ander inspireer.”
• “Ek wil seker maak dat enigeen wat ons mooi strande besoek, ingelig is oor die gevaar van die see en rotse, nie almal besef dat selfs vlak water ’n gevaar kan wees nie.”
• “My vriend het verdrink toe ek klein was, en ek het van daardie tyd af geweet ek wil eendag ’n lewensredder wees om ander mense die pyn van verlies te spaar.”
Simeon Robinson vertel dat hy as lewensredder gereed is en volle vertroue in sy opleiding het om lewens op die strande te red tydens die feesseisoen.
Die lewensredders se spanleier, Nicolas Wilsnach, het afgesluit met ’n kragtige boodskap:
“’n Lewensredder is meer as net ’n gemeenskapsheld. Dit is ’n rol wat gedefinieer word deur waaksaamheid, dissipline en beslissende optrede, waar die ware maatstaf van diens nie erkenning is nie, maar lewens wat gered word wanneer elke sekonde tel.”
Feris het elkeen bedank wat bygedra het tot die suksesvolle bekendstelling van die SBM-lewensreddingspan.
Burgermeester Truter het afgesluit:
“Ons het vandag nie net lewensredders aangestel nie – ons het hoop, dissipline en gemeenskapskrag op die strande van Saldanhabaai geplant. Elke jongmens wat hier staan, dra die verantwoordelikheid om lewens te beskerm en gemeenskappe te bemagtig. Geen vakansieganger mag ooit sy of haar lewe op ons strande verloor nie. Met hierdie span se toewyding en ons gemeenskap se ondersteuning bou ons ’n toekoms waar veiligheid en jeugontwikkeling hand aan hand loop. Saldanhabaai se strande is nie net ’n plek van ontspanning nie, maar ’n simbool van ons gesamentlike verantwoordelikheid en saam kan ons sorg dat elke besoeker veilig huis toe gaan.”
You must be logged in to post a comment.