Esperia-huis brand tot op grond af, gesin haweloos gelaat

‘n Gesin van Esperia, Vredenburg, het vanoggend (Maandag 26 Januarie) net met die klere aan hul lywe die vlamme ontsnap.

Die netjiese huis in Athena-straat het omstreeks 06:00 op ‘n onverklaarbare wyse aan die brand geraak. Die brand het vermoedelik in die sitkamer ontstaan terwyl die ma en kinders nog geslaap het.

Mlamli Mvubu, ‘n Transnet-werker, moes by die werk hoor dat sy vrou, Thandokazi, en hul drie kinders net-net betyds uit die brandende huis kon ontsnap. Die gesin wat die woonstel aan die huis gehuur het, het ook ‘n noue ontkoming gehad.

Die brandweer van die Saldanhabaai-munisipaliteit het sowat drie ure onverpoosd gespook om die brand te blus.

Elowayne Gouws en die West Coast Medical Rescue-span het die oudste kind, wat gestremd is, én ‘n buurman met rookverwante beserings in die hospitaal opgeneem. Die buurman het glo onverskrokke die huis binnegegaan om dié kind te red.

Om klere en benodigdhede vir die gesin te skenk, kan Carli Smook van die Esperia-buurtwag by die omgeegroep gebel word op 061 580 4655.

• Babadoeke word dringend benodig asook kinderklere vir ‘n tweejarige meisie en seuns van drie, vier en elf jaar oud. Thandokazi dra ‘n nommer-5-skoen en vroueklere nommer 34, Mlamli mansklere nommer 34 en nommer-8-skoene. Die elfjarige dra klere van 11-12 jaar oud en nommer-1-skoene.