Die Bergrivier vloei sterk ná die onlangse reënval, met vissers en inwoners in Bokkomlaan wat reeds voorsorg tref vir moontlike stygende water gedurende die nag.
Bokkomlaan, ‘n bekende toeristebestemming in Velddrif, bruis van bedrywigheid nadat die onlangse reënval in die Wes-Kaap die watervlakke van die Bergrivier merkbaar laat styg het.
Inwoners en besoekers het die afgelope paar dae saamgedrom om die sterk vloei van die rivier dop te hou.
Tydens Weslander se besoek op Donderdag 14 Mei het die rivier reeds aansienlik sterker gevloei. Sommige van die bekende visserhuisies langs Bokkomlaan het voorsorg getref met die pak van ‘n sandsakwal en seile in afwagting op moontlike hoër watervlak.
Volgens Dirkie Voges van die Dagbreek-visserye word verwag dat die watervlak in Bokkomlaan moontlik teen ongeveer 02:00 op Vrydag 15 Mei nog verder kan styg soos wat die vloedwater vanuit die Paarl in die Weskus aankom.
Kyk hoe lyk Bokkomlaan:
Hoewel die rivier tans vol opdrifsels is ná die reën, sê Voges dat vissers steeds kan uitvaar. Hulle het vanoggend na Dwarskersbos vertrek om harders te vang, wat vir die maak van bokkoms gebruik word.
You must be logged in to post a comment.