’n Familie in Noordhoek in Velddrif het onlangs al hul besittings in ’n huisbrand verloor en die Velddrif-sakekamer het ingespring om hulle te help.

Volgens Johnny Da Silva, voorsitter van die Velddrif-sakekamer, het die gesin klere, skoene, komberse, persoonlike besittings, huishoudelike items en baie van die basiese dinge wat meeste van ons elke dag gebruik, nodig.

“Op hierdie stadium plaas ons nie streng beperkings op wat geskenk kan word nie, omdat die behoefte wyd is. Met winter wat nader kom, sal warm klere, komberse, beddegoed, skoene, tekkies en noodsaaklike huishoudelike items baie waardeer word. Die gesin sal ook ondersteuning nodig hê om weer ’n veilige tuiste te herbou en te vestig sodra die polisieondersoek afgehandel is en hulle kan voortgaan.”

Da Silva meen ’n tragedie soos dié raak nie net een huishouding nie, maar die hele gemeenskap. Die huis het op Saterdag 2 Mei afgebrand.

As ’n sakekamer glo Da Silva dat dit belangrik is om die gemeenskap in tye van nood te ondersteun, omdat die mense wat geraak word, ook werknemers, kliënte, verskaffers, diensverskaffers of mense kan wees waarop ons in ons daaglikse lewe staatmaak.

“’n Sterk gemeenskap ondersteun sterk besighede, en sterk besighede behoort die gemeenskap te help ondersteun. ’n Gelukkige, ondersteunde gemeenskap skep ’n gesonder omgewing vir almal.”

Donasies kan by 3DOM & Co Koffiewinkel, Port Owen, Velddrif, en by die Mini-mark in Dwarskersbos afgelaai word. Vir meer inligting bel Vicky Steyn, sekretaris van die Velddrif-sakekamer, by 081 591 0815.

Klere en skoengroottes

Kind 1: nommer-9-skoen, nommer-30-broek en medium hemp.
Kind 2: nommer-7-skoen, nommer-30-broek en medium hemp.
Kind 3: nommer-4-skoen, klein broek.
Kind 4: nommer-2-skoen, nommer-10 of -11 broek.
Ma: nommer-5-skoen, klere nommer-36.