Tertuis Simmers, die Provinsiale Minister van Infrastruktuur, en Alan Winde. die Wes-Kaapse Premier, het amptelik die Malmesbury-ompad van R693 miljoen geopen. Die gebeurtenis het op Dinsdag 31 Maart plaasgevind.
Die konstruksie van hierdie noodsaaklike 6,7 km lange groenveldpad vanaf die Hopefield-wisselaar op die N7 tot by die kruising van die R45 na Wellington en die R46 na Riebeek-Kasteel het in Mei 2023 begin.
Jandré Bakker, Direkteur: Operasionele Ondersteuning van die Departement van Infrastruktuur (DOI), sê benewens die padverbinding, sluit die projek die konstruksie van vyf nuwe brûe en ‘n graadgeskeide wisselaar by die R45/R46-kruising in.
“Hierdie opgraderings is ontwerp om toegang te verbeter, veiligheid te verhoog, reistye te verminder en ekonomiese aktiwiteit in die Swartland-gebied te versterk. Hierdie projek vorm deel van ‘n groter vervoerinfrastruktuurprojek vir ‘n vragroete wat die Saldanhabaai-gebied met die belangrikste interstreekse vervoerroetes in die Wes-Kaap verbind. Hierdie opgraderings is belangrike komponente van Strategiese Geïntegreerde Projek 5 van die Nasionale Infrastruktuurplan 2050,” het Bakker bygevoeg.
Simmers het gesê dat die hoofkontrakteur in groot DOI-kontrakte soos hierdie moet verslag doen teen ‘n stel ooreengekome kontrakdeelnamedoelwitte. “Hierdie projek het 287 werksgeleenthede geskep en 39 plaaslike ondernemings en 15 opkomende kontrakteurs ondersteun. Maar afgesien van die skep van hierdie geleenthede tydens konstruksie, sal dit die plaaslike ekonomie, veral die landbousektor in die streek, in staat stel om te groei en selfs meer werksgeleenthede te skep. Dit is hoekom ons in die Wes-Kaap bou – om ekonomiese groei moontlik te maak sodat werksgeleenthede geskep kan word.”
Winde het bygevoeg dat die projek ‘n belegging in die toekoms van die provinsie is en dat elke kilometer van goed geboude en goed onderhoue pad ontsluit geleenthede.
“Dit verbind gemeenskappe, ondersteun besighede en skep werksgeleenthede. Infrastruktuur soos hierdie is die ruggraat van ‘n groeiende ekonomie, wat die doeltreffende beweging van goedere en mense moontlik maak, koste verminder en verdere beleggings lok.”
“Die Wes-Kaapse Regering bly daartoe verbind om infrastruktuurlewering regoor die provinsie te versnel, te verseker dat gemeenskappe verbind is en dat die streek se infrastruktuur volgehoue ekonomiese groei kan ondersteun. Dit is ons bydrae tot die Wes-Kaapse Regering se doelwit om ‘n triljoenrand-ekonomie te word,” het Simmers afgesluit.
You must be logged in to post a comment.