Die verhaal van Carina Brown is een van visie, roeping en onwrikbare toewyding.
As stigterslid van die Weskus- jeugorkes (WCYO) en die Weskus-musiekakademie het Carina byna drie dekades lank onvermoeid gewerk om geleenthede vir jongmense te skep.
Hosken Consolidated Investments se liefdadigheidsafdeling, die HCI-stigting, het haar pas as ‘n Fenominale Vrou (Phenominal Woman) as deel van hul reeks oor uitsonderlike vroue aangewys.
Wat aanvanklik vir Carina as ‘n dapper toekomsblik begin het, het in ‘n dinamiese simfonieorkes en musiek-uitreikprogram ontwikkel, wat reeds duisende mense se lewe geraak het.
Onder haar leiding het die Weskus-Musiekakademie ‘n geakkrediteerde Unisa musiekeksamen sentrum geword, waar plaaslike studente formele kwalifikasies behaal. Sy het ook internasionale samewerkings gevestig, wat jong musikante in staat stel om saam met eweknieë wêreldwyd op te tree.
Carina, wat in Johannesburg gebore is en in Humansdorp grootgeword het, se liefde vir musiek het deur ‘n onderwyser wat haar talent raakgesien en gekoester het, ontstaan. Sy glo sedert haar jong dae musiek is meer as net ‘n vaardigheid – dit is ‘n krag wat harte verander, dissipline bou en nuwe toekomsgeleenthede oopmaak.
Carina is die stil krag agter die skerms – iemand wie se rol diep en wyd strek. Sy is die een wat vervoer reël, borgskappe bou, studente ondersteun, die daaglikse administrasie bestuur en senuweeagtige jong kunstenaars voor ‘n konsert bemoedig.
As uitvoerende direkteur en programkoördineerder sien sy toe dat geen kind weens omstandighede uitgesluit word nie.
Vir baie WCYO-alumni, insluitend dié wat vandag professionele musikante is, was Carina die bestendige aanmoediger wat hul reis moontlik gemaak het.
Carina het in 2023 ‘n ernstige val gehad wat tot voortdurende mediese uitdagings gelei het, maar selfs te midde van persoonlike stryd het sy met verstommende vasberadenheid aangehou om die WCYO te dien.
Haar veerkragtigheid het die bewondering van almal om haar verdiep. Sy bly opdaag, bly dra, bly bou – altyd met die kinders se belange eerste.
Sy verwys dikwels na ‘n aanhaling van Shinichi Suzuki wat haar leierskap en menswees opsom: “Musiekonderrig is nie die hoofdoel nie. Ek wil goeie burgers bemagtig … Hulle kry ten minste die beste.”
Carina is ‘n mentor, ‘n organiseerder en visionêr. Haar na- latenskap van musiekonderrig, jeugbemagtiging en gemeenskapsbou is onafskeidbaar van haar onverskrokke toewyding.
You must be logged in to post a comment.