Die Atlantis-polisie het onlangs hul tien mees gesoekte mense vir Mei bekendgemaak. Volgens kapt. Lisa Munro, ’n plaaslike polisiewoordvoerder, word die mense vir verskillende misdade gesoek.
Die oortredings wissel van moord, verkragting, besit van vuurwapens en ernstige aanranding, het Munro bevestig.
Volgens Janine Passens van die Survivors Haven Foundation, wat slagoffers van seksuele misdrywe ondersteun, vra die organisasie dat borgtog nié aan seksuele oortreders toegestaan moet word nie.
Volgens Passens is baie van die verdagtes uit op borgtog of is op parool vrygelaat, en dit maak dit maklik vir oortreders om te verdwyn. Dit is baie frustrerend om verdagtes lag-lag uit die hof te sien stap,” verduidelik sy. “Daar is niks wat ons as organisasie kan doen as die hof besluit die verdagte moet vrygelaat word net om weer dieselfde misdaad te gaan pleeg nie,” voeg sy by.
Sy meen dit kan baie help as die polisie belonings kan uitloof aangesien die gemeenskap ook dan meer betrokke sal raak.
Munro rig egter ’n pleidooi aan die gemeenskap om die polisie by te staan en te help om die verdagtes op te spoor.
- Enigiemand met enige inligting word gevra om die polisiekantoor by 021 571 8551 te skakel of lt.kol Reeves by 082 469 3261 te bel.
