WELKOM – ‘n Groep van 17 jong ruiters van BRS Riding School neem deel aan die Sanesa- nasionale kampioenskapsbyeenkoms wat van Donderdag 24 September tot Maandag by Kyalami Park in Johannesburg plaasvind.
Die ruiters het deur hul deelname en prestasies gedurende die Sanesa-seisoen hul plek in die Vrystaat-span verdien.
Hulle sal in ‘n verskeidenheid dissiplines deelneem, waaronder skouspring, dressuur, Prix Caprilli, equitation, Working Hunter, Working Riding en Performance Riding.
Die 17 BRS-ruiters wat die Vrystaat gaan verteenwoordig, is: Zonika van den Berg, Janke Rossouw, Kara Taute, Ivanka Erasmus, Hanno van Jaarsveld, Ava Adendorff, Kelsey Smith, Mike Calitz, Phoebe Kilian, Beaule Jordaan, Ethan Erasmus, Miah Erasmus, Bekker Taute, Lizay Jonker, Atile Mohlatsane, Hlompo Mohlatsane en Desmond MacCaskill.
Die span word afgerig deur Belinda Basson, met Shaylene Basson as assistent-afrigter.
Die inlywingsdag op 12 September by BRS buite Riebeckstad was die begin van hierdie besondere avontuur as ‘n span.
Die ruiters wat gekies is, het aan verskeie uitdagende spanaktiwiteite deelgeneem om mekaar beter te leer ken en om samehorigheid te bou voordat hulle die Vrystaat op nasionale vlak gaan verteenwoordig.
Vir hierdie jong ruiters is deelname aan die nasionale kampioenskap die hoogtepunt van ‘n seisoen van harde werk, oefening, toewyding en baie ure saam met hul perde. Perdry verg nie net tegniese vaardigheid nie, maar ook dissipline, geduld, deursettingsvermoë en ‘n sterk vertrouensband tussen ruiter en perd.
Nou wag die groot verhoog by Kyalami Park, waar die ruiters hul vaardighede teen ruiters van oor die land heen gaan meet.
LEES OOK: Ruiters sit hul beste voetjie voor
You must be logged in to post a comment.