KARIEGA – ‘n Dringende beroep word op besighede en inwoners van Kariega gedoen om hande te vat en ‘n verskil te maak in die lewens van bejaarde SASSA-pensioenarisse wat in Bairdstraat en Johnstraat woon.

Volgens beskikbare inligting sukkel dié inwoners al langer as twee jaar met veiligheidsprobleme, naamlik dat hulle voorhekke nie behoorlik funksioneer nie. Waterpype, geisers en ander toebehore is al by hulle gesteel.

‘n Oproep tot gemeenskapsamewerking

André en Monique Drury, eienaars van Topairy Lane Coffee and Gifts Café in Moselweg, wat die onderneming op 1 Junie oorgeneem het, doen ‘n beroep op plaaslike besighede om betrokke te raak en finansiële bydraes te maak vir die herstel van die veiligheidshekke.

Die doel is om nuwe hek­motors te bekom en die nodige herstelwerk te doen sodat die toegangshekke weer behoorlik kan funksioneer. Dajees het aangebied om die hek­motors teen ‘n afslagprys beskikbaar te stel. Die area, oorgroei deur bosse en bome, gaan ook skoongemaak word.

“Ons kan nie toelaat dat ons ouer mense hul goue jare in vrees deurbring nie. Hulle verdien om veilig te voel in hul eie huise. As ons as gemeenskap hande vat, kan ons ‘n werklike verskil maak,” sê Monique.

AfriForum-buurtwag gaan ook betrokke raak

AfriForum se Mosel-buurtwag gaan betrokke raak by die skoonmaak van die area en deur R5,000 te skenk vir die projek. Die beraamde koste van die projek beloop ongeveer R30,000. Dit sluit nie net die hek­motors in nie, maar ook die herstel van mure wat beskadig is.

Louis van der Vyver, streekskoördineerder van AfriForum in die Oos-Kaap, het bevestig dat hulle ook snags in die omgewing patrolleer om ‘n groter gevoel van veiligheid te help skep.

Rynhardt Fourie van die DA, wat ook ‘n formele lid van die Uitenhage Rotariërklub is, het bevestig dat hulle ook ‘n bydrae tot die inisiatief gaan maak en help waar hulle kan. Monique Drury het reeds R1,000 tot die projek belowe.

Diegene betrokke doen ‘n beroep op besighede, organisasies en gemeenskapslede om te oorweeg om ‘n bydrae te maak, ongeag die bedrag. “Dit gaan nie net oor hek­motors en mure nie. Dit gaan oor mense, oor veiligheid en oor die waardigheid van ons ouer inwoners. Ons vra besighede om asseblief betrokke te raak. Elke bydrae, hoe klein ook al, kan help om hierdie mense se lewensomstandighede te verbeter,” sê Monique.

Vir meer inligting, kontak Monique Drury by 083 393 6069 of Louis van der Vyver van AfriForum Oos-Kaap by 066 486 7611. AfriForum kan ook ‘n brief vir belastingdoeleindes voorsien aan besighede wat sodanige dokumentasie benodig, onderhewig aan die toepaslike vereistes.

LEES OOK: Bay waste sites among Eastern Cape’s worst in AfriForum audit