Die voormalige Wes-Kaapse polisiekommissaris en voormalige provinsiale minister van gemeenskapsveiligheid dr. Lennit Max het pas sy outobiografie bekendgestel. Die bekendstelling is by die NG kerk Welgelegen gehou.

Die boek is getiteld A Life that Refused to Bow. Dit vertel die verhaal van Max, wat uit armoede en ‘n beperkte formele opvoeding tot ‘n senior polisiebeampte, openbare figuur en doktor in die regte gevorder het.

Agtergrond

Max is in Soutkuil naby Klipdale gebore. Hy het skool op ‘n vroeë ouderdom verlaat weens ‘n geldtekort en as ‘n draadspanner gewerk, en ná dit as ‘n arbeider op plase. Hierna het hy by die spoorweë aangesluit.

Hy sou jare later by die polisie aansluit waar hy blootgestel is aan misdaad, geweld, verskillende gemeenskappe en die strafregstelsel.

Max het as lid van die polisie ook sy studies voortgesit. Hy kon daarin slaag om sy matriek te behaal, maar ook ‘n nasionale diploma in polisieadministrasie bekom. Dit is gevolg deur sy graad in die regte en ook ‘n hoër sertifikaat in forensiese navorsing.

Sy lewensverhaal vorm die kern van die boek, sê hy.

Dit is nie bloot ‘n outobiografie oor ‘n loopbaan in die polisie, of politieke betrokkenheid nie, dit is die verhaal van ‘n man wat herhaaldelik omstandighede teëgekom het, wat kon tou opgegooi het, en herhaaldelik geweier het dat dit hom onderkry, lui ‘n beskrywing van die boek.

Max het later jare die politiek betree.

Inspirasie

Die outobiografie bring hulde aan sy familie, vriende, kollegas en mentors wat hom op sy pad beïnvloed het. Dit weerspieël sy kinderervarings, moeilike omstandighede, professionele uitdagings, politieke teleurstellings en persoonlike mylpale.

A Life that Refused to Bow handel meer oor wat hy bereik het, dit is ‘n boodskap aan jong Suid-Afrikaners wat dalk glo dat armoede, benadeling of moeilike omstandighede reeds jou toekoms bepaal het, skryf Max. Sy lewe, meen hy, oortuig hulle anders.

LEES OOK: Kindertekeninge gesoek vir splinternuwe Liewe Heksie-boek