Die stories wat die moed, oorlewing, genesing, hoop, deursettingsvermoë en die merkwaardige veerkragtigheid van 21 vroue weerspieël, is verlede Saterdag bekendgestel.

Die verhale van die vroue is vervat in ‘n bloemlesing “Haar Verhaal van Krag” om die vroue se lewenservarings in ’n blywende gepubliseerde nalatenskap te omskep.

Die bekendstelling van die inspirerende bloemlesing by die Melton Rose-biblioteek in Kleinvlei, Eersterivier, was die hoogtepunt van ‘n gemeenskapsgedrewe skryfinisiatief vir vroue, wat deur Rita Swanepoel gelei en gefasiliteer.

Swanepoel is ’n aktiewe lid van die gemeenskap wat verskeie skryfklubs bestuur en geleenthede skep vir aspirantskrywers om hul vaardighede te ontwikkel, hulself kreatief uit te druk en hul stories te deel.

Persoonlike vertellings

As die hoofdryfkrag agter die Her Voice-projek het Swanepoel die inisiatief gekonseptualiseer, suksesvol befondsing van die Nasionale Kunsteraad van Suid-Afrika verkry, die skryfwerksessies aangebied en deelnemers deur die proses begelei om hul persoonlike vertellings tot gestruktureerde kortverhale te ontwikkel. Die werksessies is by deelnemende biblioteke van die Stad Kaapstad aangebied.

Die projek is tot stand gebring om aan vroue, veral dié uit benadeelde gemeenskappe en dié wat deur geweld, armoede, verlies en moeilike lewensomstandighede geraak is, die geleentheid te bied om hul stories te vertel — dikwels vir die eerste keer.

Altesame 24 vroue is aanvanklik gekies om aan die skryfontwikkelingsprogram deel te neem.

“Vir baie was dit hul eerste ervaring daarvan om ’n kortverhaal te skryf of diep persoonlike ervarings op skrif te stel,” sê René Walker, areahoof vir biblioteek- en inligtingsdienste (area 6) van die Stad Kaapstad.

Werksessies

Deur ’n reeks gestruktureerde werksessies het die vroue geleer hoe om herinneringe en lewenservarings in betekenisvolle vertellings te omskep, karakters te ontwikkel, verhale te struktureer, spanning te skep en emosie eerlik oor te dra.

“Die proses het verskeie rondes van herskryf, mentorskap en noukeurige redigering ingesluit.

“Hoewel die reis soms emosioneel en veeleisend was, het die deelnemers volhard. Met elke nuwe weergawe het hul selfvertroue gegroei en hul skryfwerk sterker geword.

“Surene Esterhuizen en Stefaans Coetzee het ’n belangrike rol gespeel om die publikasie saam te stel en die individuele verhale in die voltooide bloemlesing te bundel,” sê Walker.

Gemeenskapsgedrewe inisiatiewe

Walker sê sy ondersteun gemeenskapsgedrewe inisiatiewe wat betekenisvolle geleenthede vir inwoners skep. Nadat sy die waarde van die Her Voice-projek raakgesien het, het Walker die skrywers en werksessies by die biblioteke verwelkom en hul deelname aan die inisiatief ondersteun.

Sy het met biblioteke in haar gebied kontak gemaak om potensiële deelnemers uit plaaslike gemeenskappe met die projek in verbinding te bring, en die gebruik van biblioteke as toeganklike en verwelkomende ruimtes vir die werksessie ondersteun.

Die inisiatief het biblioteke in Melton Rose, Eersterivier, Sir Lowry’s Pass en Bellville betrek.

Biblioteekpersoneel het die projek ondersteun deur ruimtes beskikbaar te stel waar die vroue kon ontmoet, leer, skryf en mekaar aanmoedig.

Ontwikkel tot Lighthouse-filosofie

Die projek weerspieël Walker se benadering tot die ontwikkeling van gemeenskapgesentreerde biblioteekdienste.

Haar Raise a Village-filosofie, wat gedurende haar tyd as hoof van die Durbanville-biblioteek bekendgestel is, erken dat biblioteke hul grootste impak bereik wanneer hulle saam met inwoners, vrywilligers, gemeenskapsorganisasies en vennote werk.

Hierdie Raise a Village-filosofie het later, toe Walker as gebiedshoof aangestel is, ontwikkel tot haar breër Lighthouse-filosofie, “wat elke biblioteek aanmoedig om as ’n betroubare baken van kennis, tuiswees, hoop en geleentheid binne sy gemeenskap te dien”.

Geleenthede vir nuwe stories

“Biblioteke behoort nie slegs toegang te bied tot stories wat reeds geskryf is nie. Hulle behoort ook geleenthede te skep vir nuwe stories om te ontstaan,” sê Walker.

“Die Her Voice-projek demonstreer wat bereik kan word wanneer gemeenskapslede en biblioteke saamwerk. Rita het die visie, kundigheid en vasberadenheid gebring, terwyl die biblioteke verwelkomende ruimtes gebied het waar vroue kon leer, skryf, groei en mekaar ondersteun.

“Die impak van die projek strek verder as die publikasie van die bloemlesing. Skrywerskringe is by sommige van die deelnemende biblioteke tot stand gebring, wat volgehoue geleenthede vir kreatiewe uitdrukking, leer, portuurondersteuning en gemeenskapsbetrokkenheid skep.

“Hierdie skrywerskringe stel deelnemers in staat om voort te gaan om hul skryfwerk te ontwikkel, mekaar te ondersteun en nuwe skrywers aan te moedig om betrokke te raak.

“Die projek demonstreer dat biblioteke nie slegs plekke is waar boeke geleen en gelees word nie,” sê sy.

ALSO READ: Knitting Ducks makes a difference in lives of traumatised children