Riebeek Animal Welfare (RAW) wil al die afgelope vyf jaar graag ’n toegewyde voertuig kry om dienste aan die viervoetige gemeenskapslede in die Vallei meer doeltreffend te lewer. Daardie droom het verlede Vrydag (10 November) ’n werklikheid geword toe ’n splinternuwe paneelwa met borrelende en luidrugtige gejuig in Riebeek-Kasteel “Suzi” gedoop is.
Om daar te kom, het baie bespreking en beplanning, ruim skenkings, versigtige hantering van hul geldsake en ’n paar goed ondersteunde geldinsamelings behels.
Die oorspronklike doelwit van R120 000 is vroeër vanjaar bereik, maar die soektog na ’n betroubare gebruikte bakkie was teleurstellend. Die pad het dus ’n draai gevat en fokus is op ’n nuwe paneelwa gerig.
“Dit het beteken ons moes net harder werk om geld in te samel, terwyl dit ook voldoende kontantvloei in RAW se werkende rekening geëis het. Ons doelwit van R200 000 was tot onlangs net-net buite bereik,” sê RAW se voorsitter, Bev Voigt.
Toe vlieg ’n paar plaaslike feetjies in wat hul towerstafies in die rigting van hul verbindings vir skenkings gemik het om vir hulp te gaan vra.
Die magiese resultaat was ’n nuwe Suzuki Eco-paneelwa.
Andre-Ross Louw, die handelaarshoof by Mekor Suzuki in Constantiaberg, het rubbermatte en lisensiekoste bygevoeg en Suzi gratis in die vallei laat aflewer.
Die waarde van vrywilligers
Die RAW is ’n onafhanklike organisasie sonder winsoogmerk, wat in 2018 deur die inwoner Andy Grobler gestig is.
Hy het verlede jaar die leisels aan Voigt oorhandig.
Dit word geheel en al deur skenkings gefinansier en die voortgesette werking daarvan berus op ’n span ongelooflik toegewyde vrywilligers.
Die grootste deel van inkomste kom uit die bedrywige RAW Charity Shop in ’Kasteel, wat dankbaar is vir die konstante vloei van goeie geskenkte voorraad wat hulle ontvang.
Hierdie geld help met inenting en sterilisasie vir troeteldiereienaars sonder inkomste of lae-inkomste-inwoners van die Riebeekvallei. In gevalle van kroniese siekte of besering word diere teen ’n billike tarief deur die sorgsame veeartse by die Bergzicht-dierehospitaal in Malmesbury behandel.
“Suzi sal gebruik word vir die vervoer van diere en hul eienaars na en van ons klinieke en veeartsbesoeke, asook vir ons Vrydag-voedingsuitreike. Sy sal toegerus word met noodsaaklike toerusting en medikasie wat ons in staat sal stel om diere in die veld te behandel en te toets,” sê Voigt.
Dit vat ’n dorpie …
Met haar kief handelsmerk, geskenk deur ’n plaaslike onderneming, sal Suzi ’n sterk teenwoordigheid in die plaaslike gemeenskap wees. Sy sal ook ’n groot seën wees vir mense en hul diere wat die RAW se dienste benodig en ook ’n groot seën vir die organisasie se missie, “Help diere. Verander lewens”.
Die oorspronklike “B(r)akkie-fonds”, nou die “Suzi Stash”, bly behoue om brandstof, versekering en dienste te dek.
Hoewel dit onlangs heeltemal uitgeput was, was dit byna onmiddellik weer vloeibaar danksy ’n erflating in eer van ’n geliefde troeteldier.
“Suzi is ’n goeie bewys van die krag van die gemeenskap se inspanning. Om dit te omskryf … dit neem ’n dorp om ’n bakkie groot te maak, en dié dorpie is trots daarop,” sê Voigt.
“Suzi, ons wens jou sterkte toe op jou reise. Mag jy vir een dier op ’n slag ’n verskil maak, kilometer vir kilometer, en mag jy ook die lewe van duisende verander.” . Besoek facebook.com/riebeekanimalwelfare of www.riebeekanimalwelfare.org.za of skakel 063 139 2256 vir nog inligting of om aan RAW te skenk.
