Drie mense is ernstig beseer ná ’n ontploffing vroeër vanmiddag (10 Junie) by ’n sakeperseel in Malmesbury.
Volgens sers. Henry du Randt, ’n polisiewoordvoerder vir die Malmesbury-polisiekantoor het ’n ontploffing omstreeks 15:05 by Nova Voere, deel van die pluimveegroep Quantum Foods, se aanleg in Bokomoweg plaasgevind. Een van die beseerdes is na die Tygerberg-hospitaal se brandeenheid vervoer terwyl die ander twee na die Swartland-hospitaal geneem is vir verdere behandeling.
“Op hierdie stadium is ’n ondersoek van stapel gestuur deur die maatskappy, Swartland-munisipaliteit se brand- en reddingsdienste en die departement van arbeid.”
Du Randt sê dit is nog onbekend wat tot die ontploffing gelei het.
*Hierdie is ‘n ontwikkelende storie en sal aangepas word soos inligting bekend word.
