Schoonspruit Sekondêr se ’22-matrieks maak hul merk

Schoonspruit Sekondêr se matriekleerders van 2022, wat hul seniorsertifikaateksamenuitslae Vrydag (20 Januarie) ontvang het, het ’n slaagsyfer van 79,6% behaal en spog met 27 vakonderskeidings.

Daarmee saam is ’n 100% in 11 vakke verwerf.

Khanyisa Mana het ses onderskeidings en ’n gemiddeld van 83,7% behaal, wat haar die topmatrikulant van Schoonspruit Sekondêr se 2022-klas maak.

Kort agter haar is Yusrah Kasu (twee onderskeidings) en Tameran Mentoor (een onderskeiding).

Die ander toppresteerders was Norman Maphuna (drie onderskeidings), Maurichia Stevens (een onderskeiding) en Glenessha Swarts (een onderskeiding).

Raynard de Jager, die skoolhoof, het die matriekklas van 2022 met hul uitslae gelukgewens, en dié wat dit nie gemaak het nie, bemoedig. “Leerders wat dit nie gemaak het nie, het ’n tweede kans.” Hy het die groep voorspoed op hul pad toegewens.

Een van die oudmatriekleerders, Mbasa Pike, het met die bekendmaking van die uitslae Vrydag gesê sy besluit nog om verder te studeer, maar is tevrede met die punte wat sy in die eindeksamen behaal het.

Phiwokuhle Tiya het op haar beurt gesê die eindeksamen was moeilik, maar deur God se genade het Hy vir haar die pad oopgemaak.