Byna twee weke nadat erge weerstoestande dele van die Wes-Kaap geteister het, werk herstelspanne steeds onverpoosd om elektrisiteit te herstel, paaie te heropen en gemeenskappe by te staan wat steeds met die nagevolge van die storms worstel.

Die Wes-Kaapse premier Alan Winde het Sondag (24 Mei) gesê herstel- en opruimingswerk duur steeds voort in verskeie distrikte, met regeringsdepartemente, munisipaliteite en hulporganisasies wat aanhou werk om noodsaaklike dienste te herstel en humanitêre hulp te verskaf.

Die onlangse weerstoestande is nou amptelik as rampe geklassifiseer weens die omvang van die skade aan infrastruktuur en dienslewering regoor die provinsie.

Hoewel elektrisiteit reeds aan die meeste geaffekteerde gebiede herstel is, ondervind sommige gemeenskappe steeds kragonderbrekings. Volgens Winde het Eskom reeds kragtoevoer aan 80% van geaffekteerde verbruikers herstel, hoewel herstelwerk bemoeilik word deur moeilik bereikbare gebiede, vandalisme en kabeldiefstal.

“Ons verstaan die frustrasie wat baie inwoners tans ervaar. Dit was ’n buitengewoon moeilike tyd en ons, saam met alle rolspelers, vra om verskoning vir enige ongerief,” het Winde gesê.

“Ons bedank inwoners vir hul geduld. Amptenare werk onverpoosd onder uiters moeilike omstandighede om elektrisiteit en ander noodsaaklike dienste so vinnig en veilig moontlik te herstel.”

In die Kaapse Wynland-distrik vorder herstelwerk aan die hoofkraglyn tussen Boskloof en Romansrivier goed, terwyl spanne ook aandag gee aan foute in Chavonnes, Hexrivier, Rawsonville en Witzenberg.

Werk duur ook voort in ander dele van die provinsie, waaronder Citrusdal in die Cederberg, waar beskadigde pale en geleiers vervang word. Verskeie gebiede in die Tuinroete-distrik, insluitend Blanco-plase en Harkerville, is steeds sonder krag.

Die provinsie het gesê 400 paaie is deur die storms geraak, waarvan meer as 60% reeds herstel en heropen is.

Hulporganisasies en nieregeringsorganisasies het intussen humanitêre hulpverlening in geaffekteerde gemeenskappe opgeskerp deur etes, komberse, matrasse, water, babapakkies en klere te versprei.

Winde het Vrydag (22 Mei) die Mustadafin-stigting in Kaapstad besoek, waar vrywilligers warm etes en noodhulppakkies aan behoeftige inwoners verskaf het.

“Die werk wat hierdie stigting en ander organisasies doen, is inspirerend. Dankie vir julle onselfsugtigheid,” het hy gesê.

Hy het ook die Nasionale Seereddingsinstituut se Vrywilliger-ondersteuningsentrum in Kaapstad besoek ná talle soek- en reddingsoperasies tydens en ná die storms.

“Hierdie dapper vroue en mans gee hul tyd en kundigheid sonder huiwering en stel dikwels hul eie veiligheid in gevaar om ander te help. Julle is werklik buitengewoon,” het Winde gesê.

Die Provinsiale Rampbestuursentrum koördineer steeds hersteloperasies regoor die provinsie.

Inwoners word versoek om owerhede, insluitend distriksmunisipaliteite, te kontak om probleme aan te meld:
* Kaapse Wynlande – 021 886 9244 / 021 887 4446
* Sentraal-Karoo – 021 449 8000
* Tuinroete – 021 805 5071
* Overberg – 028 425 1690
* Weskus – 022 495 0229 / 022 495 0231
* Stad Kaapstad – 107 landlyn of 021 480 7700