Hoërskool Pietersburg se o.16-jukskeispan het op 24 September, Erfenisdag, hul talente ten toon gestel by die Jukskei SA Skoletoernooi. Dit is aangebied by Gauteng-Noord se bane.
Die o.16-Jukskeispan, bestaande uit Elandri Henning, Liane Lombard, Juanisja Lane en Anrike Nagel, het teen sterk kompetisie met vasberadenheid en spangees meegeding. Hulle tweede wedstryd is met trots gewen. Dit is ’n hoogtepunt wat hul vaardigheid en fokus onderstreep. Uiteindelik het die span ’n verdienstelike sewende plek behaal.
Vir Elandri Henning was dit ’n besondere geleentheid: nadat sy verlede jaar as ’n JSA-uitblinker by die nasionale toernooi in Kroonstad aangewys is, is sy vanjaar weer genooi om saam met haar span die skool se kleure te verdedig.
Jukskei, ’n eg tradisionele Suid-Afrikaanse sport wat diep gewortel is in ons kultuur, pas perfek by die viering van Erfenisdag. Dit herinner aan gemeenskap, vaardigheid en die trots waarmee jong spelers hul erfenis uitleef.
Die skoolgemeenskap is trots: “Ons vlag wapper hoog! Julle het gewys wat dit beteken om ’n Pieties te wees,” lui die boodskap van die sportafdeling.
Foto’s verskaf
You must be logged in to post a comment.