Biscoff-yskastert

Deur Marlo Kitshoff-Carstens

Foto Winifred Harms

Bestanddele

Kors

• 375 g (3 x 125 g-pakkies) Biscoff-koekies
• 80 g botter, gesmelt

Vulsel

• 500 g (2 x 250 g-houers) roomkaas, by kamertemperatuur
• 250 ml (1 k) Biscoff-smeer
• 250 ml (1 k) versiersuiker, gesif
• 500 ml (2 k) vars room
• 5 ml (1 t) vanieljegeursel

Bolaag

• 250 ml (1 k) Biscoff-smeer
• ekstra Biscoff-koekies (opsioneel)

Metode

Kors

1. Spuit losboomkoekpan van 22 cm in deursnee met kossproei.
2. Sny ongeveer helfte van koekies in middel of 3/4 deur met skerp mes, of wat nodig is om die ronde losboomkoekpan langs kante vol te pak.
3. Gebruik oorblywende 1/4 deel van koekies om saam met oorblywende koekies fyn te maak.
4. Pak gehalveerde koekies of 3/4 gesnyde koekies met die mooi kant teen koekpan se rand.
5. Maak koekies in voedselverwerker fyn.
6. Meng gesmelte botter by koekie-krummels tot goed deurgewerk.
7. Druk koekiekrummels op bodem van koekpan vas.
8. Druk ook bietjie krummels aan agterkant van regop gepakte koekies vas.

Vulsel

1. Klits roomkaas tot glad met houtlepel of elektriese klitser.
2. Roer gesifte versiersuiker by roomkaas.
3. Klits room tot styf.
4. Roer geklitste room en Biscoff-smeer beurtelings by roomkaasmengsel in.
5. Skep vulsel in koekiekors. Maak bokant glad en gelyk.
6. Plaas oornag in yskas.

Bolaag

1. Maak Biscoff-smeer net vir paar sekondes in mikrogolfoond warm sodat dit net kan loop. Dit moenie warm wees nie.
2. Giet smeer bo-oor.
3. Rond tert verder af soos verkies.

Lees ook: Marlo se kolletjieskoek | rooi rose