Marlo se kolletjieskoek

Witkoek

Bestanddele

• 125 ml (½ k) olie
• 125 ml (½ k) strooisuiker
• 3 eiers
• 5 ml (1 t) vanieljegeursel
• 375 ml (1½ k) koekmeel
• 5 ml (1 t) bakpoeier
• 1 ml koeksoda
• knypie sout
• 125 ml (½ k) karringmelk

Metode

Stel oond op 180 °C.

1. Klits olie en suiker saam in mengbak.
2. Voeg eiers en vanieljegeursel by. Klits nog 2 minute tot goed gemeng.
3. Sif meel, bakpoeier, koeksoda en sout in mengbak.
4. Roer droë bestanddele en karringmelk beurtelings by eiermengsel tot dit gladde beslag vorm.
5. Giet beslag in gesmeerde pan van 23 cm × 33 cm wat met bakpapier uitgevoer. Hoe groter die pan, hoe beter, want jy benodig platter koek. Bak vir 20 tot 25 minute.
6. Haal koek uit oond en laat afkoel.

Versiersel

• 125 g (¼ blok) sagte botter
• 750 ml (3 k) versiersuiker, gesif
• 5 ml (1 t) vanieljegeursel
• bietjie melk
• 250 g (1 houer) roomkaas by kamertemperatuur
• 250 ml (1 k) strooiversiersel (hundreds and thousands)

1. Klits botter tot liggeel met elektriese klitser.
2. Voeg bietjies versiersuiker en vanieljegeursel by en hou aan klits tot lekker pofferig.
3. Hou aan om versiersuiker bietjiesgewys by te voeg en klits tot donserig. Voeg bietjie melk by indien nodig.
4. Roer roomkaas by en klits tot net gemeng.
5. Skep helfte van versiersel in spuitsak met spuitpunt.
6. Hou oorblywende versiersel eenkant om bo-oor koekies te smeer.

Sit aanmekaar

1. Gebruik glashouer of -bakkie om dit in voor te sit. Druk dit in koek om sirkels uit koek te sny of gebruik koekiedrukker van dieselfde grootte.
2. Plaas uitgedrukte koeksirkel in houer.
3. Spuit dun lagie versiersel bo-op koeksirkel.
4. Sit nog koeksirkel bo-op en smeer dikker laag versiersel bo-op.
5. Smeer boonste laag versiersel gelyk.
6. Gooi genoeg strooiversiersel in groot genoeg bak.
7. Druk boonste koeklaag met versiersel (onderstebo) in strooiversiersel (hundreds and thousands) sodat lagie daarvan aan versiersel kleef.
8. Sit voor.