Die Sishen-rugbyklub is weereens die wenner van Griekwaland-Wes se Superliga-reeks.
Reeds vanaf 2012 tree Sishen as die ligawenners uit dié stryd.
Vanjaar het hulle die trofee gelig ná die eindstrydkragmeting teen die Kimberley-rugbyklub op 15 Julie op die Windhoek Draught-park in Kimberley.
Sishen het Kimberley met 35 – 33 geklop. Die halftydtelling was 18 – 26 in Kimberley se guns.
Die resep vir Sishen se sukses lê onder meer daarin dat sy spelers weet hoe om onder druk te speel, met jare se ervaring van meeding in eindstrydwedstryde.
So vertel Johan Peens, spanbestuurder en mede-afrigter sedert 2017. Hy sê dat nog ’n voordeel vir die Sishen-span die feit is dat hulle ook aan die Gold Cup-liga deelneem wat baie harde spel vereis. Die Sishen-span het al ’n negende plek tydens die liga behaal.
Boonop ding hulle ook in die Van Druten-liga mee.
Kondisionering vir die Gold Cup-liga begin in Augustus, met die liga wat in September begin.
“Ons spanlede kom meestal van die plaaslike kollege, baie is jonk uit die skool. Hulle word absoluut op meriete gekies,” sê Peens wat van 2010 tot 2016 ’n speler in die span was.
Die klub vier op 12 Augustus sy 70ste bestaansjaar tydens ’n naweek vol aktiwiteite.
Besoek die Facebook-blad Sishen Rugby Klub vir meer inligting hieroor.
