Groeiende rioolstortings in die Phokwane-munisipaliteit strek tot in landbougrond met pekanneutboorde, wat veroorsaak dat bome vrek.
Boonop, ná maande lange gesukkel om die munisipaliteit sover te kry om die ou rioolpompstasie in Jan Kempdorp te herstel, vernietig diefstal en sabotasie vordering wat gemaak word.
In ’n verklaring versoek Annette van Wyk, DA-raadslid, verbeterde veiligheidsmaatreëls en verskerpte polisie-ondersoeke om munisipale infrastruktuur te beskerm.
Van Wyk sê in die verklaring dat ’n oorsig-inspeksie en gesprekke met boere, wat deur haar en Dirk Stubbe, Diamant-Noord-kiesafdelingshoof uitgevoer is, die omvang van die omgewingskade blootgelê het.
“Inwoners en besighede in die nywerheidsgebied moet elke dag die stank van die rioolvuil verduur. Boere ervaar verwoestende verliese in hul pekanneutboomplantasies,” sê sy.
Riool versprei van die ou pompstasie, naby die Hoërskool Vaalharts, langs die R378-pad, verby die dorp, tot by pekanneutboorde. Dit raak ook die gemeenskap van Valspan, die Hoërskool Tlhwahalang en die silo’s, waar twee lyke voorheen in die rioolwater gevind is.
Van Wyk sê dit is ’n gesondheid-, veiligheid- en omgewingkrisis, en sê die DA het aanhou veg dat die munisipaliteit die ou geroesde pompstasie en die hele asbespyplyn van Jan Kempdorp na Ganspan herstel en opgradeer.
Die DA het die omgewingsbesoedeling by die Groen Skerpioene aangemeld en is bekommerd oor hoe die grond gerehabiliteer sal word. Die party sal ook met die SAPD kontak maak.
