Charles Peter (CP) Mathewson van Kimberley het tydens die afgelope naweek se o.30-meesterstoernooi-byeenkoms van Rolbal Suid-Afrika ’n silwermedalje verwerf.
“Dit is ’n prestasie. CP het uitstekende spel gelewer, maar op dié dag was sy teenstander net beter as hy – dit gebeur,” sê Braam van der Westhuizen, president van Noord-Kaap-rolbal.
Driaan van Niekerk, die ander Noord-Kaapse rolbalspeler wat aan dié o.30-meesterstoernooi by die Wingatepark-rolbalklub in Pretoria deelgeneem het, het net-net nie die halfeindronde gehaal nie; steeds het hy uitstekende rolbal gespeel, vertel Van der Westhuizen.
Dié toernooi word as een van die grootstes in die land beskou.
Eerskomende naweek, op Saterdag 17 Februarie en Sondag, vind die Noord-Kaapse mans- en vroue enkelkampioenskappe in Kimberley plaas.
“Die room van Noord-Kaapse rolbalspelers gaan dit uitspook.
“Ek nooi almal uit om die wedstryde by die Beaconsfield- en Sol Plaatjie-rolbalbane by te woon,” sê Van der Westhuizen.
Volgende op die kalender vir Noord-Kaap-rolbal is die mans- en vrouespanne in die ope-, B- en veteraanafdeling wat van 2 tot 8 Maart sake op nasionale vlak in Gqeberha, George en Pretoria gaan uitspook.
Spelers vanuit die hele Noord-Kaap gaan die spanne verteenwoordig, onder meer van Upington, Kuruman, Prieska, Hanover, Kimberley en Hartswater.
Noord-Kaap-rolbal bestaan uit vier sub-distrikte – Kimberley, Kalahari, Intervaal en Conroy. Rolbal as sport raak toenemend gewild onder jonger mense.
