Sussie se woelwaterstreke was vandag duidelik. Teen aandete mors sy jogurt op die kombuistafel en smeer dit met groot hale van kant tot kant terwyl haar ma vir haar broer ’n broodjie smeer.
Daarna dring sy aan op “kringetjiespap”. In die hoop dat sy eet, kry sy ’n kwart bakkie vol daarvan en onderdompel sy dit met groot genot in haar Drink-o-Pop.
Mamma gooi ’n blinde oog (wat nie te moeilik tydens beurtkrag is nie).
Badtyd besluit sy om eers poedelnaak in die wasmandjie te sit en haar “boot” te roei. Asof die water nie koud genoeg is nie, kruip sy om ’n duistere rede in die badkamerkas weg en skree toe sy haar kop stamp.
Haar ma dreig haar om uit te klim en te was, of die storietyd verkort.
Later weier sy om met die eerste versoek uit die byna leeggetapte bad te klim. Haar ma praat met ’n kwaai stem en sê sy gaan net ’n Bybelstorie hoor, maar Sussie sit en beproef op watter omliggende oppervlakke boerseep merke laat.
Ná die Bybelstorie en die herinnering dat sy ongehoorsaam was en nie ’n voorgeleesde storie kry nie, bars sy luidkeels in trane uit. Haar ma, ’n boekliefhebber, voel skuldig oor die streng gevolg en besluit om eerder ’n ander straf uit te dink, maar dít is ’n plig vir die môre of vir haar pa.
Vanaand vier Mamma haar dogter se vindingrykheid met ’n glimlag nadat dié en die Sandman mekaar tydens beurtkrag se laaste minute ontmoet het.
